ខេត្តពោធិ៍សាត់៖ ឯកឧត្តម លី ណារុន រដ្ឋលេខាធិការ និងជាប្រធានក្រុមប្រឹក្សភិបាលគម្រោង ឥណទានក្រសួងអភិវឌ្ឍន៍ជនបទ រួមនិងក្រុមការងារបានអញ្ជើញចុះត្រួតពិនិត្យ និងផ្ទៀងផ្ទាត់វឌ្ឍនភាពគម្រោងឥណទាន របស់អង្គភាពអនុវត្តគម្រោងឥណទានក្រសួងអភិវឌ្ឍន៍ជនបទខេត្តពោធិ៍សាត់ ។
បើតាមលោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តបានឲ្យដឹងថា គម្រោងឥណទាននេះត្រូវបានចាប់ផ្តើមអនុវត្តន៍ក្នុងខេត្តពោធិ៍សាត់តាំងពីឆ្នាំ១៩៩៩ ដោយមន្ទីរកិច្ចការនារីខេត្តមានភូមិគោលដៅចំនួន៤ ។ បន្ទាប់មកមន្ទីរកិច្ចការនារីខេត្តបានផ្ទេរមកអោយមន្ទីរអភិវឌ្ឍន៍ជនបទខេត្តជាអ្នកអនុវត្តន៍បន្ត ហើយក្នុងឆ្នាំ២០០០ មន្ទីរអភិវឌ្ឍន៍ជនបទខេត្តបានចុះកិច្ចព្រមព្រៀងជាដៃគូរសហប្រតិបត្តិការជាមួយអង្គការ រ៉ាឆា(RACHA) មន្ទីរសុខាភិបាលខេត្ត និងអាជ្ញាធរមូលដ្ឋាន ។ ហើយបច្ចុប្បន្នគម្រោងឥណទាននេះ គ្រប់ដណ្តប់ក្នុងស្រុក-ក្រុងចំនួន៦ និងគ្របដណ្តប់លើស្រុកប្រតិបត្តិសុខភាពចំនួន៤ មានចំនួន១០មណ្ឌលសុខភាព និងអនុវត្តន៍លើភូមិគោលដៅសរុបចំនួន ៣៧ភូមិ។ដោយមានអ្នកខ្ចីសរុបចំនួន៩០៣គ្រួសារ ក្នុងនោះអ្នកខ្ចីជាស្ត្រីចំនួន៨២៧គ្រួសារ ចំពោះប្រាក់កម្ចីខ្ពស់បំផុតដែលអាចខ្ចីបានគឺកំណត់ត្រឹម ២,៥លានរៀល ។
ឯកឧត្តម លី ណារុន បានមានប្រសាសន៍លើកឡើងថា គម្រោងឥណទាននេះ ជាគម្រោងឥណទានគាំទ្រសុខភាពសហគមន៍ បង្កើតឡើងក្នុងគោលបំណង ៖ -បង្កើតមុខរបរ បង្កើនប្រាក់ចំណូលក្នុងគ្រួសារ និងបំផុសអោយស្ត្រីមានគំនិតសហគ្រិនភាព - ធ្វើអោយជីវភាពរស់នៅរបស់ប្រជាពលរដ្ឋកាន់តែប្រសើរឡើង - ផ្តល់សេវាគាំទ្រផ្នែកសុខភាពតាមសហគមន៍ ពិសេសសុខភាពបន្តពូជស្ត្រី និងកុមារ - គាំទ្រមណ្ឌលសុខភាពតាមសហគមន៍ដើម្បីធានានូវការបំរើសេវាសុខភាពជូនប្រជាពលរដ្ឋបានប្រសើរឡើង ។ ឯកឧត្តម បានបន្តថា តាមរយៈសកម្មភាពការងារ និងលទ្ធផលការងារសម្រេចបានរបស់អង្គភាពគ្រប់គ្រងគម្រោងឥណទានក្រសួងអភិវឌ្ឍន៍ជនបទខេត្តពោធិ៍សាត់ គឺមានភាពល្អប្រសើរ ដែលអាចនឹងក្លាយជាគំរូដ៏ល្អមួយសម្រាប់ខេត្តផ្សេងយកទៅអនុវត្តន៍។ ជាមួយគ្នានេះផងដែរ ក្នុងឱកាសចុះជួបសមាជិកគម្រោងឥណទាន ដែលជាប្រជាពលរដ្ឋរស់នៅក្នុងឃុំស្នាមព្រះ ស្រុកបាកាន ឯកឧត្តម លី ណារុន សូមឲ្យបងប្អូនប្រជាពលរដ្ឋគួរយកប្រាក់កម្ចីទៅប្រើប្រាស់ឲ្យត្រូវគោលដៅដើម្បីជីវភាពកាន់តែល្អប្រសើរ កុំយកទៅចំណាយលើសម្ភារៈនិយម ឬយកទៅលេងល្បែងស៊ីសង ៕ អត្ថបទ៖ ភិរុណ ពៅ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
