នៅព្រឹកថ្ងៃទី១២ ខែមីនា ឆ្នាំ២០២៤ គណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រ​សិល្បៈ និងទេសចរណ៍ នៃរដ្ឋសភា (គណៈកម្មការទី៧) ដឹកនាំដោយ ឯកឧត្តម ប៉ា សុជាតិ​វង្ស ប្រធានគណៈកម្មការ បានចុះសិក្សាស្វែងយល់ពីការងារដែលគណៈកម្មការទទួលបន្ទុក នៅ​ខេត្ត​កំពង់ធំ ដោយបានជួបពិភាក្សាការងារជាមួយ ឯកឧត្តម ងួន រតនៈ អភិបាល នៃគណៈ​អភិបាល​ខេត្តកំពង់ធំ រួមនិងមន្ទីរអង្គភាពពាក់ព័ន្ធក្នុងខេត្ត។

ឯកឧត្តម ប៉ា សុជាតិវង្ស ប្រធានគណៈកម្មការទី៧ នៃរដ្ឋសភា បានលើកឡើងថា កិច្ច​ប្រជុំ​នា​ពេល​នេះ មិនមែនជាការចុះមកត្រួតពិនិត្យ អធិការកិច្ច ឬសួរដេញ​ដោល​ថ្នាក់​ដឹកនាំ​រដ្ឋបាល​ខេត្ត​នោះ​ទេ គោលបំណងសំខាន់ គឺដើម្បីស្វែងយល់ពីវឌ្ឍនភាពការងារ និងបញ្ហាប្រឈមនានា ដែល​ពាក់​ព័ន្ធនឹង​វិស័យអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍។

ឯកឧត្តម ងួន រតនៈ អភិបាលខេត្តកំពង់ធំ បានលើក​ឡើង​ពី​វឌ្ឍនភាព​នានា​ដែល​ខេត្ត​សម្រេច​បាន​ជាពិសេស គឺផែនការសកម្មភាព និងការអនុវត្តកម្មវិធីនយោបាយ និងយុទ្ធសាស្ត្រ​បញ្ច​កោណ​របស់​រាជរដ្ឋាភិបាលនីតិកាលទី៧ នៃរដ្ឋសភា។ ឯកឧត្តមបានបន្តថា ចំពោះវិស័យអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ អាជ្ញាធរ​ខេត្ត​ក៏ដូច​ជា​មន្ទីរ​អង្គភាព​ជំនាញ​ពាក់ព័ន្ធ​បាន​នឹង​កំពុង​ខិតខំ​ប្រឹង​ប្រែង​អនុវត្តន៍​ទៅ​តាម​គោល​នយោបាយ​របស់​រាជ​រដ្ឋាភិបាល​ឱ្យ​មានប្រសិទ្ធភាព។

ឯកឧត្តម ប៉ា សុជាតិវង្ស បានវាយតម្លៃខ្ពស់ចំពោះការខិតខំប្រឹងប្រែងរបស់រដ្ឋបាលខេត្ត ក្នុង​ការ​កសាង​សមិទ្ធផលជាច្រើនជូនដល់ប្រជាពលរដ្ឋក្នុងខេត្ត ក៏ដូចជាការ​បន្ត​ពង្រីក​សក្តានុពល នៃ​ខេត្ត​របស់​ខ្លួន ពិសេសវិស័យទទួលបន្ទុករបស់គណៈកម្មការទី៧ នៃរដ្ឋសភា។ សម្រាប់​បញ្ហា​ប្រឈម​របស់​ខេត្ត គណៈកម្មការទី៧ នៃរដ្ឋសភា នឹងធ្វើរបាយការណ៍​ជម្រាប​ជូន​សម្តេច​មហា​រដ្ឋសភា​ធិការធិបតី ឃួន សុដារី ប្រធានរដ្ឋសភា និងជូនព័ត៌មាន​ទៅ​ក្រសួង​ពាក់ព័ន្ធ ដើម្បី​ធ្វើ​ការ​ពិនិត្យ និងដោះស្រាយ។

ក្នុងនាមអភិបាល នៃគណៈអភិបាលខេត្ត ឯកឧត្តម ងួន រតនៈ បាន​ថ្លែង​អំណរ​គុណ​យ៉ាង​ជ្រាល​ជ្រៅដ​ល់ ឯកឧត្តម ប៉ា សុជាតិវង្ស ប្រធានគណៈកម្មកាទី៧ នៃរដ្ឋសភា និងប្រតិភូ​អម​ដំណើរ​ដែល​បានចំណាយពេលវេលាដ៏មានតម្លៃចុះបំពេញបេសកកម្មសិក្សាស្វែងយល់ពី ចំណុច​ខ្លាំង និងចំណុចត្រូវកែលម្អ របស់វិស័យពាក់ព័ន្ធនៅក្នុងខេត្តកំពង់ធំ៕