នៅថ្ងៃទី១២ ខែមីនានេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បាន​អញ្ជើញប្រគល់សញ្ញាបត្រជូនសិស្សនិស្សិតជាង៥០០នាក់ នៅវិទ្យាស្ថាន​ប៉េអេអឺ​នៃ​អង្គភាព ដើម្បី​ភាព​ញញឹម នៃកុមារ ឆ្នាំសិក្សា២០១៨ និង២០២០ ហើយក្នុងពិធីនេះ បណ្តាសិស្ស​និស្សិត​អះអា​ង​ថា បច្ចុប្បន្នគ្រួសាររបស់គេមានជីវភាពប្រើសើរ ក្រោយពួកគេបានរៀនចប់ មានការងារធ្វើ និ​ង​បានប្រាក់ខែ។

សិស្ស និងអាណាព្យាបាលបានថ្លែងអំណរគុណជាខ្លាំងទៅដល់សាលា PSE និងរាជរដ្ឋាភិបាល ដែល​ជួយ​ផ្តល់អាហារូបករណ៍ និងសប្បរសជននានា ដែលជួយ​កូន​ចៅពលរដ្ឋ​ក្នុង​គ្រួសារ​ក្រីក្រ​បាន​ចូល​រៀនជំនាញវិជ្ជាជីវៈនានា ថែមទាំងមានផ្តល់អាហារប្រចាំថ្ងៃ ផ្តល់កន្លែង​ស្នាក់នៅ​ត្រឹ​ម​ត្រូវ​បំផុត សម្រាប់ការសិក្សារៀនជំនាញតាំងពីដើមរហូតដល់ចប់ និងមានការងារធ្វើត្រឹមត្រូវ មាន​ប្រាក់​ខែ​សមរម្យ។

ឯកឧត្តម ហេង សួរ បានអំពាវនាវ សប្បុរសជនជាតិ អន្តរជាតិ និងស្ថាប័នរដ្ឋ ឯកជននានា បន្ត​និង​បង្កើនការជួយឧបត្ថម្ភសាលា PSE ដើម្បីបង្កើនឱកាសឲ្យអង្គការជួយយុវជន យុវនារី មកពី​គ្រួសារ​ក្រីក្រ និងងាយជួបហានីភ័យបានឱកាសចូលសិក្សារៀនជំនាញវិជ្ជាជីវៈនៅក្នុងសាលា PSE ដើម្បីកែប្រែជីវភាពពួកគេ។

បើតាមលោកស្រី ដេប៉ាលីយែរ លក្ខិណា នាយិកាគ្រប់គ្រងអង្គការដើម្បីភាពញញឹមនៃកុមារ PSE ថ្លែង​ថា បច្ចុប្បន្នអង្គការ បានទទួលជំនួយ បណ្តុះបណ្តាលជំនាញវិជ្ជាជីវៈ និងបច្ចេកទេស TVET របស់​ក្រសួង​ការងារ បណ្តុះបណ្តាលជំនាញក្រោយជំនួយមូលនិធិអភិវឌ្ឍជំនាញ SDF នៃក្រសួង​សេដ្ឋកិច្ច និងហិរញ្ញវត្ថុ និងជំនួយមួយចំនួនទៀត បានមកពីដៃគូសប្បុរសជនជាតិ អន្តរជាតិ ដោយ​បាន​ផ្តល់​ការបណ្តុះបណ្តាលជំនាញវិជ្ជាជីវៈ និងបច្ចេកទេសចំនួន ១៨ មុខជំនាញ រួមមាន​វិស័យ​សំណង់ មេកានិច បច្ចេកទេសភាពយន្ត ធុរកិច្ចគ្រប់គ្រងអាជីវកម្ម វិស័យបដិសណ្ឋារកិច្ច និង​ទេសចរណ៍ជាដើម៕ អត្ថបទ៖ ស៊ុម សុខជា