រដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយនៅថ្ងៃអង្គារនេះថា លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) កំពុងធ្វើឲ្យអ៊ីស្រាអែលចុះខ្សោយជាមួយនឹងវិធីសាស្រ្តរបស់ខ្លួនចំពោះសង្គ្រាមនៅតំបន់ហ្កាហ្សា ហើយបានជំរុញឲ្យប្រទេសនេះផ្លាស់ប្តូរទិសដៅ បើមិនដូច្នេះទេ កាន់តែបាត់បង់ការគាំទ្រពីអន្តរជាតិបន្ថែមទៀត។

ប្រធានាធិបតីសហរដ្ឋអាមេរិក លោកបៃដិន បាននិយាយកាលពីថ្ងៃសៅរ៍ថា លោកណេតាន់យ៉ាហ៊ូ កំពុង «ធ្វើឲ្យអ៊ីស្រាអែលឈឺចាប់ជាងការជួយ» ដោយធ្វើសង្រ្គាមតាមរបៀបដែលផ្ទុយនឹងគុណតម្លៃរបស់ប្រទេសនេះ។

នៅពេលសួរអំពីការអត្ថាធិប្បាយរបស់គាត់នៅថ្ងៃអង្គារនេះ លោកស្រី Wong បានយល់ស្រប ហើយបាននិយាយថា ការគាំទ្រពីអន្តរជាតិសម្រាប់អ៊ីស្រាអែល នឹងបន្តថយចុះ ប្រសិនបើប្រទេសនេះមិនដោះស្រាយ «មហន្តរាយមនុស្សធម៌» នៅតំបន់ហ្កាហ្សាទេ។

លោកស្រី Wong បានថ្លែងនៅឯកិច្ចប្រជុំកំពូលធុរកិច្ចត្រួតពិនិត្យហិរញ្ញវត្ថុអូស្ត្រាលីនៅថ្ងៃអង្គារនេះថា៖«ថ្ងៃទី៧ ខែតុលា គឺជាការវាយប្រហារភេរវកម្ម ហើយពិភពលោកពិតជាមានការអាណិតអាសូរ និងសាមគ្គីភាពជាមួយអ៊ីស្រាអែល នៅពេលនោះ»។

«ខ្ញុំគិតថា ពិភពលោកមានការភ័យរន្ធត់ជាមួយនឹងស្ថានភាពបច្ចុប្បន្ន... ហើយខ្ញុំនឹងនិយាយថា ប្រសិនបើស្រាអែល មិនផ្លាស់ប្តូរទិសដៅរបស់ខ្លួនទេ ខ្លួននឹងបន្តបាត់បង់ការគាំទ្រ»។

សង្គ្រាមនេះ ត្រូវបានបង្កឡើងដោយការវាយប្រហារកាលពីថ្ងៃទី៧ ខែតុលា ទៅលើអ៊ីស្រាអែលដោយក្រុមហាម៉ាស ដែលក្នុងនោះ មនុស្ស ១.២០០នាក់ ត្រូវបានសម្លាប់ និង ២៥៣ នាក់ត្រូវបានចាប់ធ្វើជាចំណាប់ថ្នូរ នេះបើយោងតាមចំនួនសរុបរបស់អ៊ីស្រាអែល។ មន្ត្រីហ្កាហ្សា បាននិយាយថា ការវាយប្រហារតាមផ្លូវអាកាស និងផ្លូវគោករបស់អ៊ីស្រាអែលទៅលើតំបន់ហ្កាហ្សា ឥឡូវនេះ បានសម្លាប់ប្រជាជនប៉ាឡេស្ទីនចំនួន ៣១.០០០នាក់ហើយ។