ទីភ្នាក់ងារស៊ើបការណ៍ចារកម្មសម្ងាត់របស់សហរដ្ឋអាមេរិក បាននិយាយកាលពីថ្ងៃចន្ទ (១១ មីនា) នៅក្នុងរបាយការណ៍ដែលបានចេញផ្សាយនៅពេលដែលមេដឹកនាំទីភ្នាក់ងារនេះបានផ្តល់សក្ខីកម្មនៅក្នុងសភាថា អាមេរិកកំពុងប្រឈមមុខនឹង «សណ្តាប់ធ្នាប់ពិភពលោកកាន់តែផុយស្រួយ» ដែលកាន់តែតានតឹងឡើងដោយសារការប្រកួតប្រជែងអំណាច បញ្ហាប្រឈមឆ្លងដែន និងជម្លោះក្នុងតំបន់។

របាយការណ៍នេះផ្តោតជាសំខាន់លើការគំរាមកំហែងពីចិន និងរុស្ស៊ី ដែលជាគូប្រជែងដ៏ធំបំផុតចំពោះសហរដ្ឋអាមេរិក រយៈពេលជាងពីរឆ្នាំបន្ទាប់ពីរុស្ស៊ី បានចាប់ផ្តើមការលុកលុយអ៊ុយក្រែន ក៏ដូចជាការកត់សម្គាល់ពីហានិភ័យនៃជម្លោះកាន់តែទូលំទូលាយទាក់ទងនឹងយុទ្ធនាការរបស់អ៊ីស្រាអែល ប្រឆាំងនឹងក្រុមហាម៉ាស នៅតំបន់ហ្កាហ្សា ចាប់តាំងពីការវាយប្រហារថ្ងៃទី០៧ ខែតុលា មក។

នាយកទីភ្នាក់ងារស៊ើបការណ៍សម្ងាត់ជាតិ លោកស្រី អាវរីល ហៃណេស (Avril Haines) បានលើកឡើងពីការព្រួយបារម្ភថា ជម្លោះនៅតំបន់ហ្កាហ្សា រវាងអ៊ីស្រាអែល និងក្រុមហាម៉ាស អាចរីករាលដាលបង្កជាអសន្តិសុខពិភពលោក។

នាយកភ្នាក់ងារស៊ើបអង្កេតសហព័ន្ធ FBI លោក គ្រីសស្តូហ្វើ រ៉ាយ (Christopher Wray) បានសម្តែងការព្រួយបារម្ភអំពី «ផលប៉ះពាល់នៃអំពើភេរវកម្ម តាមរយៈលទ្ធភាពនៃការកំណត់គោលដៅលើភាពងាយរងគ្រោះនៅតាមព្រំដែន» ដោយកត់សម្គាល់កំណើនការគំរាមកំហែងពីជនជាតិអាមេរិក ដែលត្រូវបានបំផុសគំនិតដោយក្រុមអ៊ីស្លាមនិយម និងពួកសកម្មប្រយុទ្ធបរទេសផ្សេងទៀត ចាប់តាំងពីជម្លោះជុំថ្មីរវាងក្រុមហាម៉ាស លើអ៊ីស្រាអែល បានចាប់ផ្ដើមមក៕