ក្រសួងការពារជាតិបាននិយាយកាលពីថ្ងៃច័ន្ទ (១១ មីនា) ថាប្រទេសបេឡារុស បានចាប់ផ្តើមការត្រួតពិនិត្យពេញលេញលើការត្រៀមខ្លួនប្រយុទ្ធរបស់កងកម្លាំងប្រដាប់អាវុធ ដោយយោងទៅលើសមយុទ្ធរបស់អង្គការសន្ធិសញ្ញាអាត្លង់ទិកខាងជើង (NATO) ដែលកំពុងតែប្រព្រឹត្តទៅនៅជិតព្រំដែនរបស់ខ្លួន។

ក្រសួងនេះបាននិយាយនៅក្នុងសារតេឡេក្រាម ដោយដកស្រង់សម្តីលោក វីកទ័រ ហ្គូឡេវីច (Viktor Gulevich) ប្រធានអគ្គសេនាធិការនៃកងកម្លាំងប្រដាប់អាវុធបេឡារុស និងអនុរដ្ឋមន្ត្រីការពារជាតិទី១ ថា «កងកម្លាំងប្រដាប់អាវុធកំពុងយកចិត្តទុកដាក់យ៉ាងខ្លាំងក្នុងការរក្សាកម្រិតខ្ពស់នៃការប្រយុទ្ធ និងការត្រៀមលក្ខណៈចល័តក្នុងស្ថានភាពនយោបាយយោធាដែលកាន់តែធ្ងន់ធ្ងរនាពេលបច្ចុប្បន្ន»។

លោក ហ្គូឡេវីច និយាយថា ការត្រួតពិនិត្យនេះការឆ្លើយតបទៅនឹងសមយុទ្ធរបស់សម្ព័ន្ធយោធាណាតូ ដែលធ្វើឡើងនៅទូទាំងទ្វីបអឺរ៉ុប រួមទាំងសមយុទ្ធ ដ្រាហ្គន-២៤ (Dragon 24) ដែលដឹកនាំដោយប៉ូឡូញ ដែលកំពុងដំណើរការក្នុងក្របខ័ណ្ឌនៃសមយុទ្ធយោធាការពារស្ថិរភាពរបស់ណាតូ ដោយនោះជាសមយុទ្ធដ៏ធំបំផុតនៅអឺរ៉ុបក្នុងរយៈពេលជាច្រើនទសវត្សរ៍។

ប្រធានកងកម្លាំងបេឡារុសរូបនេះបានបន្ថែមថា អង្គភាពយោធាដែលបានចាត់តាំង នៃកងកម្លាំងប្រដាប់អាវុធរបស់ប្រទេស នឹងធ្វើសមយុទ្ធជាបន្តបន្ទាប់ ហើយប្រតិកម្មបែបនេះនឹងកាន់តែខ្លាំងនៅពេលអនាគត រួមទាំងការបង្កើនចំនួនកងទ័ពដែលចូលរួមផងដែរ៕