ប្រព័ន្ធផ្សព្វផ្សាយរដ្ឋកូរ៉េខាងជើង KCNA បាននិយាយនៅថ្ងៃអង្គារ (១២ មីនា) នេះថា អនុរដ្ឋមន្ត្រីក្រសួងការបរទេសកូរ៉េខាងជើង លោក ផាក ម្យ៉ុងហូ (Pak Myong Ho) បានជួបជាមួយប្រធានាធិបតីម៉ុងហ្គោលី លោក អ៊ុកខ្នាគីអ៊ីន គូរែលស៊ុក (Ukhnaagiin Khurelsukh) កាលពីថ្ងៃចន្ទ ក្នុងដំណើរទៅក្រៅប្រទេសដ៏កម្រមួយដោយគណៈប្រតិភូការទូតមកពីរដ្ឋផ្ដាច់ខ្លួនមួយនេះ។

ប្រព័ន្ធផ្សព្វផ្សាយ KCNA បាននិយាយថា លោក គូរែលស៊ុក និងលោក ផាក បាននិយាយអំពីការអភិវឌ្ឍទំនាក់ទំនងមិត្តភាពដែលបង្កើតឡើងដោយមេដឹកនាំមុនៗនៃប្រទេសរៀងៗខ្លួន និងការពង្រឹងការផ្លាស់ប្តូរ និងកិច្ចសហប្រតិបត្តិការទ្វេភាគី ដោយបន្ថែមថាលោក ផាក ក៏បានជួបជាមួយសមភាគីម៉ុងហ្គោលី របស់លោកកាលពីថ្ងៃចន្ទផងដែរ។

ដំណើរទស្សនកិច្ចនេះធ្វើឡើងខណៈក្រុងព្យុងយ៉ាង ទំនងជាកំពុងពង្រីកការចូលរួមការទូតបន្ទាប់ពីបានបិទព្រំដែនរបស់ខ្លួនយ៉ាងតឹងរ៉ឹងក្នុងអំឡុងពេលមានជំងឺរាតត្បាតកូវីដ១៩ និងខណៈពេលដែលកំណើនភាពតានតឹងជាមួយប្រទេសជិតខាងកូរ៉េខាងត្បូង កាន់តែខ្លាំងឡើង។

ភាពតានតឹងនៅលើឧបទ្វីបកូរ៉េ គឺស្ថិតនៅចំណុចខ្ពស់បំផុតរបស់ប្រទេសជិតខាងទាំងពីរក្នុងរយៈពេលប៉ុន្មានឆ្នាំមកនេះ បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានបង្កើនកម្លាំងអាវុធរបស់ខ្លួន និងបានចេញការគំរាមកំហែងបង្កហេតុនៃជម្លោះនុយក្លេអ៊ែរចំពោះគូប្រជែងក្នុងប៉ុន្មានខែថ្មីៗនេះ៕