ប្រទេសហៃទីកំពុងតែធ្លាក់ចូលទៅក្នុងភាពអនាធិបតេយ្យយ៉ាងឆាប់រហ័ស។ កាលពីចុងសប្តាហ៍កន្លងមក អំពើហិង្សាក្នុងរដ្ឋធានី Port-au-Prince (ព័រអូប្រាំង) បានកើនឡើងជាថ្មីម្តងទៀត។ ក្រុមអន្ធពាលប្រដាប់អាវុធជាច្រើននាក់បានវាយប្រហារវិមានជាតិ និងដុតបំផ្លាញផ្នែកខ្លះនៃក្រសួងមហាផ្ទៃដោយគ្រាប់បែកសាំង។

ហេតុការណ៍នេះកើតឡើង បន្ទាប់ពីមានការវាយប្រហារលើអាកាសយានដ្ឋានអន្តរជាតិដែលពេលនេះ នៅតែលុបចោលគ្រប់ជើងហោះហើរ ក្នុងនោះរួមទាំងយន្តហោះដឹកនាយករដ្ឋមន្ត្រី លោក Ariel Henry ផងដែរ។ លោក Henry បានព្យាយាមហោះហើរត្រឡប់ទៅហៃទីវិញ ដោយចាកចេញពីសហរដ្ឋអាមេរិក កាលពីសប្តាហ៍មុន ប៉ុន្តែយន្តហោះរបស់លោកត្រូវបានបដិសេធមិនឲ្យចុះចត។ ឥឡូវនេះលោក Henry កំពុងជាប់នៅកោះ Puerto Rico (ព័រតូរីកូ) ដោយមិនអាចឈានជើងចូលប្រទេសដែលលោកដឹកនាំដោយជាក់ស្តែងបាននោះឡើយ។

ដោយមិនមាននាយករដ្ឋមន្ត្រី និងរដ្ឋាភិបាល អំណាចរបស់ក្រុមអន្ធពាល ក្នុងការគ្រប់គ្រងរដ្ឋធានី គឺស្ទើរតែទាំងស្រុង។ ពួកគេគ្រប់គ្រងច្រើនជាង ៨០ភាគរយនៃទីក្រុងព័រអូប្រាំង ហើយមេដឹកនាំក្រុមអន្ធពាលដ៏ល្បីល្បាញបំផុតរបស់ប្រទេស គឺលោក Jimmy "Barbecue" Chérizier បានប្រាប់នាយករដ្ឋមន្រ្តីជាថ្មីម្តងទៀតឲ្យលាលែងពីតំណែង។

ទន្ទឹមនឹងនោះ នគរបាលដែលមានចំនួនច្រើនជាង និងគ្មានកម្លាំងចិត្ត កំពុងជួបការលំបាកទប់ទល់នឹងការលួច។ ស្ថានីយនគរបាល Salomon នៅទីក្រុងព័រអូប្រាំង ត្រូវបានវាយប្រហារ និងដុតឆេះអស់។ តែទោះប្រឈមនឹងការដួលរលំនៃច្បាប់ និងសណ្ដាប់ធ្នាប់យ៉ាងណាក៏ដោយ ក៏ប្រជាពលរដ្ឋនៅតែហ៊ានចេញរកស៊ីចិញ្ចឹមជីវិតដែរ។ នៅផ្សារក្បែរនោះ អ្នកលក់ដូរតាមដងផ្លូវជាច្រើននាក់ បានប្រាប់សារព័ត៌មាន BBC ថា ពួកគេគ្មានជម្រើសផ្សេងក្រៅពីចាកចេញពីផ្ទះរបស់ពួកគេនោះឡើយ សូម្បីតែមានខ្មាន់កាំភ្លើងដើរពេញតាមដងផ្លូវក៏ដោយ។

អស្ថិរភាពនៅប្រទេសហៃទី គឺជាបញ្ហាសម្រាប់សហគមន៍ការ៉ាអ៊ីពទាំងមូល និងទីក្រុងវ៉ាស៊ីនតោនផងដែរ។ គំនិតរបស់ប្រជាជាតិមួយនៃប្រជាជនប្រហែល ១១លាននាក់ដែលត្រូវបានគ្រប់គ្រងដោយក្រុមអន្ធពាល គឺជាក្ដីបារម្ភយ៉ាងធំធេង ជាពិសេសផលប៉ះពាល់ដែលអាចកើតមានលើការធ្វើអន្តោរប្រវេសន៍ កអំឡុងឆ្នាំបោះឆ្នោត នៅសហរដ្ឋអាមេរិក៕