នាព្រឹកថ្ងៃទី១២ ខែមីនា ឆ្នាំ២០២៤ នៅស្រុកប្រាសាទបល្ល័ង្ក ខេត្តកំពង់ធំ ឯកឧត្តម ទ្រី ដាលុច តំណាងដ៏ខ្ពង់ខ្ពស់ អ្នកឧកញ៉ាបណ្ឌិត ទ្រី ភាព និង​លោកជំទាវ​ អ្នកឧកញ៉ា គៀន ស្រីនាង បាន​អញ្ជើញ​ជា​​គណៈអធិបតី​ក្នុងពិធី​សំណេះសំណាល​ និង​អបអរសាទរ​ខួបលើកទី១១៣​ ទិវា​អន្តរជាតិ​នារី​ ៨មីនា​ ២០២៤​ ក្រោមប្រធានបទ “ស្ត្រី និង​ក្មេងស្រី​ក្នុង​បរិវត្តកម្ម​ឌីជីថល”។

ថ្លែងទៅកាន់សមាជិកសមាជិកាប្រមាណ៤៥០នាក់ក្នុងអង្គពិធី ឯកឧត្តម ទ្រី ដាលុច បាន​គូស​បញ្ជាក់ ពីការ គាំទ្រ ចំពោះ ប្រធានបទដ៏មាន សារៈសំខាន់នេះហើយ ឯកឧត្តម ក៏បាន​បន្ថែម​ទៀត​ថា ក្រសួងស្ថាប័ន ពាក់ព័ន្ធ រួមទាំងបណ្តាញផ្សព្វផ្សាយ នានា បាន​និង​កំពុង​អបអរ​សាទរ ​និងគាំទ្រយ៉ាងពេញ​ទំហឹងចំពោះ ទិវាអន្តរជាតិនារី ៨មីនា ក្រោមប្រធានបទ “ស្ត្រី និង​ក្មេង​ស្រី ក្នុងបរិវត្តកម្មឌីជីថល” ក្នុង​គោលបំណង​រំលេច​នូវសក្តានុពល​ និង​ភាពចាំបាច់​នៃការ​លើក​កម្ពស់​ការចូលរួម​ និង​ភាពជា​តំណាង​របស់ស្រ្តី និង​ក្មេងស្រី​ក្នុងវិស័យឌីជីថលប្រកបដោយប្រសិទ្ធភាព និងសុវត្ថិភាព។

ប្រធានបទឆ្នាំនេះ គឺចង់បង្ហាញឱ្យយើង ទាំងអស់គ្នាបានដឹងពីសមត្ថភាព ពិតប្រាកដ របស់​ស្រ្តី ​និងក្មេងស្រី ហើយទទួលស្គាល់ ថាស្រ្តីជាតួអង្គដ៏សំខាន់ដែលមានតួនាទីចម្បងចូលរួម ធ្វើ​ឱ្យ​សង្គម​មានស្ថិរភាព និងការអភិវឌ្ឍ ក្នុងយុគសម័យឌីជីថលនេះ។ តាមរយៈ ឧបករណ៍ ឌីជីថល​ដូចជា ទូរសព្ទ កុំព្យូទ័រ និងអ៊ីនធឺណិត ស្ត្រី និងក្មេងស្រីទាំងអស់មានឱកាស ទទួល​ព័ត៌មាន​ រៀនសូត្រ ​ទិញលក់  ចែករំលែកព័ត៌មានសង្គម និង ចំណេះដឹងពី គ្រប់ទីកន្លែង និ​ង​គ្រប់​ពេល​វេលា។

ជាចុងក្រោយ ឯកឧត្តមក៏បាននាំយក នូវ វត្ថុអនុស្សាវរីយ៍ និងថវិកា មួយចំនួនដែល ជា អំណោយ​របស់​អ្នក​ឧកញ៉ា បណ្ឌិត និងលោកជំទាវប្រគល់ជូន សមាជិក សមាជិកា ទាំងអស់សម្រាប់ ជាកាដូអបអរសាទរក្នុងទិវាអន្តរជាតិនារី ៨មីនា៕