រុស្ស៊ីបាននិយាយកាលពីថ្ងៃច័ន្ទថា ខ្លួនកាន់កាប់សមរភូមិអំណោយផលបន្ថែមទៀតនៅក្នុងមុខព្រួញជាច្រើន ខណ:ដែលភាគីអ៊ុយក្រែនបានអះអាងនៅថ្ងៃជាមួយគ្នាថា កម្លាំងយោធារបស់ខ្លួន បានវាយប្រហាប៉ុស្ដិ៍បញ្ជាការយោធារុស្ស៊ី១កន្លែងនៅជួរមុខ។

យោងតាមវីដេអូដែលបានផ្សព្វផ្សាយកាលពីថ្ងៃច័ន្ទ ដោយក្រសួងការពារជាតិរុស្ស៊ីមួយថ្ងៃមុននេះ អោយដឹងថា កងទ័ពជាតិ បានកាន់កាប់សមរភូមិអំណោយផលបន្ថែមទៀត និងទីតាំងនានា នៅមុខព្រួញជាច្រើន ដោយបានកម្ទេចការវាយបកជាច្រើនរបស់កងទ័ពអ៊ុយក្រែន។

ក្រសួងការពារជាតិថែមទាំងបានថ្លែងថា កងទ័ពរុស្ស៊ី បានបំផ្លាញអាវុធអ៊ុយក្រែនជាច្រើន ក្នុងនោះរួមមាន រថក្រោះ អាប្រាម (Abrams)ជាច្រើនគ្រឿងផលិតដោយអាមេរិក ឃ្លាំងស្ដុកគ្រាប់រំសេវ និងកន្លែងត្រួតពិនិត្យយានដ្រូន ដោយបានវាយប្រហារតំបន់ប្រមូលផ្ដុំបុគ្គលិកយោធានិងគ្រឿងយុទុធោបករណ៍ និងកន្លែងដាក់ពង្រាយទាហានស៊ីឈ្នួលបរទេសបណ្ដោះអាសន្ន។

អគ្គសេនាធិការកងទ័ពអ៊ុយក្រែន បានថ្លែងកាលពីថ្ងៃច័ន្ទថា នៅរយ:ពេល២៤ម៉ោងកន្លងទៅនេះ ការប្រយុទ្ធគ្នា៥៤លើកបានកើតឡើងនៅក្នុងតំបន់សមរភូមិជាច្រើន។ ហើយកងទ័ពអ៊ុយក្រែនបានធ្វើការវាយប្រហារលើតំបន់ប្រមូលផ្ដុំទ័ពជាច្រើន និងប៉ុស្ដិ៍បញ្ជាការសម្រាប់បុគ្គលិកយោធា និងឧបករណ៍យោធារុស្ស៊ី ដោយបានកម្ទេចប្រព័ន្ធការពារដែនអាកាសប្រភេទBuk-M1 មួយឈុត ហើយនិងប្រព័ន្ធរ៉ាដា១គ្រឿង៕