​អាមេរិក៖ ខ្សែ​កោង​ជំងឺ COVID-19 នៅ​សហរដ្ឋអាមេរិក​កំពុង​ហក់​ឡើងជា​ថ្មី​ បន្ទាប់ពី​ការ​ធ្លាក់​ចុះ​ជា​ច្រើន​ខែ​ដោយ​ចំនួន​ករណី​ឆ្លង​ថ្មី ​ក្នុង​មួយថ្ងៃ​កើន​ឡើង​ទ្វេដង​ក្នុង​រយៈពេល​ជាង ៣​សប្តាហ៍​កន្លងមក​បង្ក​ឡើង​ដោយ​វីរុស​ប​ម្លែ​ង​ខ្លួន​ថ្មី ​ដែល​កំពុង​ឆ្លង​រាលដាល​យ៉ាង​ឆាប់រហ័ស អត្រា​ការ​ចាក់​វ៉ាក់សាំង​យឺតយ៉ាវ និង​ការ​ប្រមូល​ផ្តុំ​អំឡុង​ព្រឹត្តិការណ៍​ថ្ងៃ​ទី​៤ ខែ​កក្កដា​។​

យោង​តាម​ទិន្នន័យ​របស់​សាកលវិទ្យាល័យ Johns Hopkins បាន​ឱ្យ​ដឹង​ថា ​ការ​ឆ្លង​ដែល​បាន​បញ្ជាក់​បាន​កើន​ឡើងជា​មធ្យម​ប្រហែល ២៣.៦០០​ក្នុង​មួយថ្ងៃ​កាលពី​ថ្ងៃ​ចន្ទ (១២ កក​ក្កដា​) កើន​ឡើង​ពីចំនួន ​១១.៣០០​កាលពី​ថ្ងៃ​ទី​២៣ ខែ​មិថុនា​កន្លងទៅ​។ ហើយ​ការ​កើន​ឡើង​នេះ​មាននៅ​គ្រប់​រដ្ឋ​ទាំង​អស់ លើកលែងតែ​រដ្ឋ​ពីរ​ប៉ុណ្ណោះ​គឺ​រដ្ឋ Maine និង South Dakota ដែល​បាន​រាយការណ៍​ថា ​ចំនួន​ករណី​ឆ្លង​បាន​កើន​ឡើង​ក្នុង​រយៈពេល​ ២​សប្ដាហ៍​កន្លង​មក​នេះ​។​

នៅ​ទូទាំង​ប្រទេស ៥៥,៦% ​នៃ​ជនជាតិ​អាមេរិក​ទាំងអស់​បាន​ទទួល​វ៉ាក់សាំង​បង្ការ​ជំងឺ COVID-19 យ៉ាង​ហោចណាស់​មួយ​ដូ​ស នេះ​បើ​យោង​តាម​មជ្ឈមណ្ឌល​គ្រប់គ្រង និង​បង្ការ​ជំងឺឆ្លង​អាមេរិក។ រដ្ឋ​ចំនួន ៥ ដែល​មាន​ករណី​ឆ្លង​កើន​ឡើង​ខ្ពស់​បំផុត​ក្នុង​រយៈពេល ២​សប្តាហ៍​សុទ្ធ​តែ​ជា​រដ្ឋ​មាន​អត្រា​ចាក់​វ៉ាក់សាំង​ទាប ដូចជារដ្ឋ Missouri ៤៥,៩%, រដ្ឋ Arkansas ៤៣%, រដ្ឋ Nevada ៥០,៩%, រដ្ឋ Louisiana មាន​ ៣៩,២% និង រដ្ឋ Utah មាន ៤៩,៥%​៕

អត្ថបទ៖ សុខមាន