បាល់ទាត់៖ ការប្រកួតពានរង្វាន់មិត្តហ្វូនខេមបូឌានលីគ ឬលីគកំពូលកម្ពុជាឆ្នាំ២០២១ នឹងបន្ដការប្រកួតសន្សំសប្ដាហ៍ទី៨ ក្នុងជុំទី១ នាថ្ងៃទី១៤-១៥ ខែកក្កដា ពាក់កណ្ដាលសប្ដាហ៍នេះដោយមានកម្មវិធីប្រកួត ៦គូពេញ ខណៈគូពិសេសមានក្រុមភ្នំពេញក្រោន បើកទ្វារផ្ទះទទួលក្រុមព្រះខ័នរាជស្វាយរៀង និងក្រុមវិសាខាជួបក្រុមកំពូលតារាងអង្គរថាយហ្គឺរ។
សម្រាប់កម្មវិធីប្រកួតនៅថ្ងៃទី១៤-កក្កដានេះ រួមមានក្រុមអាស៊ីអឺរ៉ុបនឹងត្រូវបន្ដធ្វើការងារធ្ងន់ ជួបក្រុមខ្លាំងណាហ្គាវើលដ៏នៅកីឡដ្ឋាន AEU Sport Park បន្ទាប់ពីរងបរាជ័យចាស់ដៃក្រោមថ្វីជើងក្រុមបឹងកេត និងវិសាខាកាលពីថ្មីៗ។ រីឯក្រុមគិរីវង់ត្រូវបើកទ្វារផ្ទះទទួលក្រុមកងយោធពលខេមភូមិន្ទ និងខេត្តព្រៃវែងជួបក្រុមនរគបាលជាតិនៅកីឡដ្ឋានខេត្តព្រៃវែង។ ការប្រកួតនេះនឹងចាប់ផ្ដើមប្រកួតម៉ោង ៣៖៣០នាទីរសៀលដូចគ្នា។ ចំណែកនៅថ្ងៃទី១៥-កក្កដាវិញ មានកម្មវិធីប្រកួតធំៗពីរ ក្នុងចំណោម ៣ប្រកួតគឺក្រុមមិនទាន់ស្គាល់ចាញ់ភ្នំពេញក្រោន ជួបក្រុមជើងឯករងឆ្នាំចាស់ព្រះខ័នរាជស្វាយរៀងនៅកីឡដ្ឋាន Smart RSN ឯវិសាខាត្រូវជួបក្រុមកំពុងឡើងជើងអង្គរថាយហ្គឺរនៅកីឡដ្ឋានព្រីនស៍ ខណៈ ១គូទៀតគឺក្រុមសូលទីអង្គរជួបក្រុមអគ្គិសនីកម្ពុជានៅកីឡដ្ឋាន SRU ខេត្តសៀមរាប។ ការប្រកួតនេះមាន ២គូចាប់ផ្ដើមប្រកួតម៉ោង ៣៖៣០នាទីរសៀល លើកលែងតែភ្នំពេញក្រោនប៉ះព្រះខ័នរាជស្វាយរៀងត្រូវប្រកួតម៉ោង ៦ល្ងាច។
គួរដឹងថា គិតត្រឹមសប្ដាហ៍ទី៧ ក្រុមអង្គរថាយហ្គឺរកំពុងឈរកំពូលតារាងបណ្ដោះអាសន្ន ដោយរកបាន ១៩ពិន្ទុក្នុងដៃជាមួយលទ្ធផល ៧ប្រកួតឈ្នះ ៦ និងស្មើ ១ មិនទាន់ស្គាល់ចាញ់ ខណៈវិសាខា ភ្នំពេញក្រោន និងព្រះខ័នរាជស្វាយរៀងរកបាន ១២ពិន្ទុស្មើគ្នា គ្រាន់តែភ្នំពេញក្រោនទើបប្រកួតបាន ៤ប្រកួត ផ្ទុយពីវិសាខា និងព្រះខ័នរាជស្វាយរៀងដែលប្រកួតបាន ៦ប្រកួត។ ដូច្នេះការប្រកួតពាក់កណ្ដាលសប្ដាហ៍នេះគឺជាជំនួបដ៏សំខាន់ ដែលអ្នកគាំទ្រទន្ទឹងរង់ចាំ ពិសេសអ្នកគាំទ្រចង់ដឹងថា វិសាខាអាចបង្អាក់ដំណើរអង្គរថាយហ្គឺរបានដែរ ឬទេ?
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
