សហភាពសហព័ន្ធយុវជនកម្ពុជា នៅថ្ងៃទី ១៣ ខែមីនា ឆ្នាំ ២០២៤នេះ បាន​រៀប​ចំកិច្ច​ប្រជុំ​គណៈកម្មាធិការ​កណ្ដាល ក្រោមអធិបតីភាព ឯកឧត្តម ហ៊ុន ម៉ានី ប្រធានសហភាព​សហព័ន្ធ​យុវជន​កម្ពុជា​។ កិច្ចប្រជុំនេះ គឺមានការបូកសរុបលទ្ធផលការងារសម្រេចបានក្នុងឆ្នាំ ២០២៣​កន្លង​ទៅ ក៏ដូចជាលើកទិសដៅការងារបន្តសម្រាប់ឆ្នាំ ២០២៤ របស់គណៈកម្មាធិការ​កណ្ដាល​សហភាព​សហព័ន្ធយយុវជនកម្ពុជា។

ឯកឧត្តម ហ៊ុន ម៉ានី ប្រធាន ស.ស.យ.ក បានលើកឡើងថា កិច្ចប្រជុំរយៈ ១ថ្ងៃកន្លះនេះ គឺជា​ការ​ជួបជុំ​ដើម្បី​បូកសរុប ពិនិត្យវាយតម្លៃ និងអបអរសាទ​រ​ចំពោះ​សមិទ្ធផល​ការងារ​ដែល​យើង​រួមគ្នា​សម្រេច​បាន និងលើកទិសដៅការងារសម្រាប់អនុវត្តនាពេលខាងមុខ។

ឯកឧត្តមបន្តថា ការរៀបចំកិច្ចប្រជុំត្រួតពិនិត្យវាយតម្លៃជាទៀងទាត់ គោលការណ៍ដឹកនាំ យន្តការ និង​របៀបរបបការងារច្បាស់លាស់ ការអនុវត្តការងារតាមរចនាសម្ព័ន្ធ ពិតជាឆ្លុះ​បញ្ចាំង​ឱ្យ​ឃើញ​នូវ​ វិន័យ សាមគ្គីភាព ភាពឯកភាពផ្ទៃក្នុង និងភាពរឹងមាំរបស់ ស.ស.យ.ក ក្នុងនាម ស្ថាប័ន​សង្គម​ដ៏ធំ ដែលជាមូលដ្ឋានគ្រឹះនៃការរីកធំធាត់ជាបន្តបន្ទាប់របស់ក្រុមគ្រួសារ ស.ស.យ.ក ទាំង​បរិមាណ គុណភាព និងសមត្ថភាព។

បើតាម​ឯកឧត្តម ហ៊ុន ម៉ានី ក្នុងរយៈពេលជាង ១ឆ្នាំ មកនេះ ស.ស.យ.ក បានពង្រឹង​តួនាទី​ស្នូល​របស់​ខ្លួន​យ៉ាងរឹងមាំ ស្របតាមបរិបទនយោបាយ សេដ្ឋកិច្ច និងសង្គមរបស់កម្ពុជា ដែលបាន​ប្រែ​ក្លាយ​រាល់​បញ្ហាប្រឈម ទៅជាកាលានុវត្តភាព ដើម្បីចូលរួមយ៉ាងសកម្មក្នុងរាល់កិច្ចការសង្គម និង​បន្ត​ចូល​រួមជាធ្លុងមួយ ជាចលនាយុវជនក្នុងបុព្វហេតុជាតិ មាតុភូមិ។ ហើយតាមរយៈការបំផុសស្មារតីស្រលាញ់ជាតិ ស.ស.យ.ក បានជំរុញនិងលើកទឹកចិត្តប្រជាជន ជា​ពិសេស​យុវជនឱ្យចូលរួមចំណែកកាន់តែផុសផុលថែមទៀត ក្នុងការកសាង និង​អភិវឌ្ឍន៍​ប្រទេស​ ដោយពង្រឹងពង្រីកចំណេះដឹង ចំណេះធ្វើ ជំនាញទសវត្សរ៍ទី ២១ ពិសេស​ការ​ពង្រឹង​វិជ្ជា​សម្បទា បំណិនសម្បទា ចរិយាសម្បទា ស្មារតីទទួលខុសត្រូវ សកម្មភាពចូលរួម និងសុខភាព ដើម្បី​ក្លាយ​ជាសសរទ្រូងរឹងមាំរបស់ប្រទេសជាតិ។

ឯកឧត្តម ក៏បានកោតសសើរ វាយតម្លៃខ្ពស់ចំពោះកិច្ចខិតខំប្រឹងប្រែងរបស់ សមាជិក សមាជិកា គណៈ​អចិន្ត្រៃយ៍ សមាជិក សមាជិកា​គណៈកម្មាធិការ​កណ្ដាល​គ្រប់រូប​ដែល​បាន​លះបង់​ចូល​រួម​ក្នុង​គោលការណ៍ ស.ស.យ.ក កន្លងមក។

ឯកឧត្តមក៏បាន​ផ្ដាំផ្ញើសួរសុខទុក្ខ និងថ្លែងអំណរគុណ ភ្ជាប់នឹងការកោតសសើរគណៈកម្មាធិការ ស.ស.យ.ក រាជធានី-ខេត្ត ក្រុងស្រុកខណ្ឌ ឃុំសង្កាត់ ក្រុមការងារ ស.ស.យ.ក តាមវិស័យនានា និងសមាជិក ស.ស.យ.ក ទាំងអស់ទូទាំងប្រទេស ដែលបានលះបង់កម្លាំងកាយ ចិត្ត ប្រាជ្ញា ស្មារតី ពេលវេលា និងធនធានផ្ទាល់របស់ខ្លួន ក្នុងការបំពេញតួនាទីភារកិច្ច យ៉ាងសកម្ម​ប្រកប​ដោយ​ស្មារតីទទួលខុសត្រូវ និងទឹកចិត្តស្រលាញ់ជាតិមាតុភូមិ ក៏ដូចជាសម្រេច​បាន​សមិទ្ធ​ផល​ថ្មីៗ​ជា​ច្រើន គួរជាទីមោទនៈ៕ អត្ថបទ៖ គឹមហុក