អភិបាលខេត្តកំពង់ចាម ឯកឧត្តម អ៊ុន ចាន់ដា បានបញ្ជាក់ថា សមត្ថកិច្ច អាជ្ញាធរដែនដី បាន​ឃ្លាំ​មើល​ជា​ប្រចាំ បើទោះបីជា សមត្ថកិច្ចយើង បានបង្ក្រាបល្បែងស៊ីសងខុសច្បាប់ ១០០% ហើយ​ក៏​ដោយ។



ឯកឧត្តមអភិបាលខេត្ត បានលើកឡើងដូច្នេះនៅក្នុងអង្គប្រជុំសាមញ្ញលើកទី៥៨ អាណត្តិទី ៣ របស់​​ក្រុម​ប្រឹក្សាខេត្តកំពង់ចាម នាថ្ងៃទី១២ ខែមីនា ឆ្នាំ២០២៤។ ឯកឧត្តម អ៊ុន​ ចាន់ដា​ អភិបាល​ខេត្តកំពង់ចាម​​បានបញ្ជាក់ទៀតថា ក្រោយពេលទទួលបានបទបញ្ជាពី សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឲ្យចុះទៅពិនិត្យ និងឈាន​ដល់​ការ​បង្ក្រាប​ បិទល្បែងស៊ីសងខុសច្បាប់ ជាពិសេសគឺប្រភេទល្បែងឆ្នោតផ្សងសំណាងផ្សេងៗ អាជ្ញាធរ​ខេត្ត​កំពង់ចាម បានបើកប្រតិបត្តិការ និងបានបិទនូវល្បែងទាំងនោះ ដែលអាចនិយាយបានថា ខេត្ត​កំពង់ចាម គឺជាខេត្ត ដែលបានធ្វើកិច្ចការនេះ បញ្ចប់មុនគេ នៃបណ្ដាខេត្តដទៃ។ ហើយ​ការ​ចុះ​អនុវត្ត​ការងារ គឺ ក្រោមរូបភាពគោលការណ៍ស្ម័គ្រចិត្ត និងធ្វើកិច្ចសន្យាកំណត់របស់សមត្ថកិច្ច នៅ​នឹង​កន្លែង ដែលក្នុងនោះសមត្ថកិច្ចយើង បានរកឃើញមានចំនួន ៤៩២ ទីតាំង ដែល​បាន​បិទ​ជា​ស្ថាពរ និងបានធ្វើកិច្ចសន្យា មិនអនុញ្ញាតឲ្យមានការបើកបន្តទៀតទេ ។

ឯកឧត្តមអភិបាលខេត្ត បានឱ្យដឹងផងដែរថា ទោះជាយ៉ាងនោះក្តី ថ្មីៗកន្លងទៅនេះ មាន ៣ ករណី បានលួចបើកលេងល្បែងផ្សងសំណាងខុសច្បាប់ ប៉ុន្តែប្រការ​នេះ​ត្រូវ​បាន​សមត្ថកិច្ច​យើង​បង្ក្រាប​ទាំង ៣ករណី និងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការ​ទៅ​តាម​នីតិ​វិធី​តែ​ម្តង ដោយមិនឱ្យមានធ្វើកិច្ចសន្យាអប់រំទៀតទេ ៕