ដោយសារបច្ចេកវិទ្យាថ្មីៗកំពុងដើរតួនាទីយ៉ាងសំខាន់ក្នុងការបម្រើដល់សេដ្ឋកិច្ចជាតិ កម្ពុជាកំពុងជំរុញការប្រើប្រាស់បច្ចេកវិទ្យាឌីជីថលនេះនៅតាមស្ថាប័នរដ្ឋ ក៏ដូចជាវិស័យឯកជន ដើម្បីធ្វើឱ្យប្រសើរឡើងនូវដំណើរការការងារ និងផលិតកម្មជាដើម ដើម្បីជំរុញផលិតភាព និងភាពប្រកួតប្រជែងក្នុងបរិបទ នៃសាកលភាវូបនីយកម្មសេដ្ឋកិច្ច និងធុរកិច្ច។
តាមរយៈពិព័រណ៍រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ រយៈពេល៣ថ្ងៃមកនេះ បានផ្តល់ជាមូលដ្ឋានគ្រឹះសម្រាប់កសាងរដ្ឋាភិបាលឌីជីថលមួយដែលមានប្រសិទ្ធភាព ការឆ្លើយតប និងផ្តោតការយកចិត្តទុក ដាក់កាន់តែច្រើនលើប្រជាពលរដ្ឋ ខណៈប្រមុខរាជរដ្ឋាភិបាលកម្ពុជា បាននិងកំពុងជំរុញពន្លឿនការអភិវឌ្ឍវិស័យបច្ចេកវិទ្យាឌីជីថលនេះ សម្រាប់ជាឃ្នាស់លើស្ទួយវិស័យពាក់ព័ន្ធនានា។
លោក ញឹម សត្យា មន្ត្រីសម្របសម្រួលមាតិកា និងវេទិកាឌីជីថល នៃមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយលើកឡើងថា គិតចាប់តាំងពីការរីករាលដាលនៃជំងឺកូវីដ១៩ រហូតមកដល់បច្ចុប្បន្ននេះ បច្ចេកវិទ្យាឌីជីថល បានដើរតួនាទីកាន់តែសំខាន់ក្នុងការបង្កើនផលិតភាព ការជំរុញពិពិធកម្មសេដ្ឋកិច្ច និងការបង្កើតឱកាសការងារ ដែលជំរុញវឌ្ឍភាពសង្គម សេដ្ឋកិច្ច ឲ្យកាន់តែរីកចម្រើនថែមទៀត។ លោកបានបន្តថា សម្រាប់វិស័យអប់រំ ការប្រើប្រាស់បច្ចេកវិទ្យាឌីជីថល មិនត្រឹមតែជួយគាំទ្រដល់វិស័យអប់រំប៉ុណ្ណោះទេ ប៉ុន្តែថែមទាំងជួយបន្ស៉ាំសិស្សទៅនឹងទំនើបកម្ម នៃបច្ចេកវិទ្យា ព្រមទាំងឆ្លើយតបនឹងបដិវដ្តន៍ឧស្សាហកម្មទី៤ ផងដែរ។
កញ្ញា ហាយ ផានីត អ្នកស្រាវជ្រាវផ្នែកកសិកម្ម នៃក្រុមហ៊ុន ឆាឡាថិច (Chalatex) បានទទួលស្គាល់ដែរថា ការអភិវឌ្ឍផ្នែកឌីជីថលក្នុងវិស័យកសិកម្ម បានជួយដល់ការធានានូវផលិតភាព និងទីផ្សារ ព្រោះថា បច្ចេកវិទ្យាឌីជីថលសព្វថ្ងៃ នេះ ពិតជាជួយយ៉ាងច្រើនសម្រាប់កសិកម្ម ដែលបានជួយសម្រួលការងារប្រចាំថ្ងៃរបស់ប្រជាកសិករ ដូចជាកាត់បន្ថយកម្លាំងពលកម្ម និងជួយសន្សំសំចៃពេលវេលាជាដើម។
សូមបញ្ជាក់ថា ក្រសួងប្រៃសណីយ៍និងទូរគមនាគមន៍ បានរៀបចំពិព័រណ៍រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ រយៈពេល ៣ថ្ងៃ ពីថ្ងៃទី១១ ដល់១៣ ខែមីនា ឆ្នាំ២០២៤នេះ នៅអគារកោះពេជ្រ។ ក្នុងកម្មវិធីនេះដែរ ក្រសួងក៏បានរៀបចំកិច្ចពិភាក្សា និងការចែករំលែកអំពីប្រធានបទសំខាន់ៗពីវាគ្មិនជាតិ និងអន្តរជាតិពាក់ព័ន្ធនឹងទិដ្ឋភាពគោលនយោបាយ និន្នាការនៃការរីកចម្រើន របស់បច្ចេកវិទ្យាឌីជីថល ការផ្លាស់ប្ដូរបទពិសោធ និងឧត្តមានុវត្តន៍ នៃការជំរុញល្បឿនបរិវត្តកម្មឌីជីថល និងការប្រើប្រាស់បច្ចេកវិទ្យាថ្មីៗផងដែរជូនដល់សាធារណៈជនទូទៅ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
