រដ្ឋាភិបាលសហរដ្ឋអាមេរិក និងអង្គការសហប្រជាជាតិ កាលពីថ្ងៃអង្គារ (១២ មីនា) បានសម្តែងការព្រួយបារម្ភអំពីច្បាប់ស្តីពីសញ្ជាតិដែលផ្អែកលើសាសនានៅក្នុងប្រទេសឥណ្ឌា ដោយអង្គការសហប្រជាជាតិបានហៅច្បាប់នេះថា «មានការរើសអើងជាមូលដ្ឋាន»។

ពលរដ្ឋឥណ្ឌាជាច្រើននាំគ្នាតវ៉ាច្បាប់ស្តីពីវិសោធនកម្មសិទ្ធិពលរដ្ឋឆ្នាំ២០១៩ (CAA) ដែលរដ្ឋាភិបាលឥណ្ឌាបានអនុវត្តកាលពីថ្ងៃចន្ទ (១១ មីនា) នេះ ខណៈអង្គការឃ្លាំមើលសិទ្ធិមនុស្ស និងអង្គការលើកលែងទោសអន្តរជាតិ និយាយថាច្បាប់នេះរើសអើងជនជាតិមូស្លីម។

រយៈពេលប៉ុន្មានសប្តាហ៍មុនការបោះឆ្នោតឥណ្ឌា រដ្ឋាភិបាលនាយករដ្ឋមន្រ្តីឥណ្ឌា លោក ណារ៉េនដ្រា ម៉ូឌី (Narendra Modi) បានជំរុញឱ្យអនុវត្តច្បាប់ ដែលធ្វើឱ្យកាន់តែងាយស្រួលក្នុងការទទួលបានសញ្ជាតិឥណ្ឌាសម្រាប់ជនភៀសខ្លួនដែលមិនមែនជាជនជាតិមូស្លីម មកពីប្រទេសចំនួនបីដែលកាន់សាសនាឥស្លាមភាគច្រើននៅអាស៊ីខាងត្បូង ដែលមានដូចជាអាហ្វហ្គានីស្ថាន ប៉ាគីស្ថាន និងបង់ក្លាដែស។

រដ្ឋាភិបាលឥណ្ឌាបដិសេធថាច្បាប់នេះមិនបានប្រឆាំងនឹងមូស្លីមទេ តែផ្ទុយទៅវិញគឺដើម្បីជួយជនជាតិភាគតិចដែលប្រឈមនឹងការធ្វើទុក្ខបុកម្នេញក្នុងបណ្ដាប្រទេសជិតខាងដែលភាគច្រើនកាន់សាសនាឥស្លាម៕