ក្រុមមន្ត្រី បាននិយាយថា ក្រុមអ្នកជួយសង្គ្រោះរបស់ប្រទេសឥណ្ឌូណេស៊ី បានចាប់ផ្តើមប្រតិបត្តិការ ស្វែងរកអ្នកនេសាទដែលបាត់ខ្លួនយ៉ាងហោចណាស់ ២២ នាក់នៅភាគកណ្តាលប្រទេស ឥណ្ឌូនេស៊ី នៅថ្ងៃពុធ ទី១៣ ខែមីនានេះ បន្ទាប់ពីទូករបស់ពួកគេបាន ក្រឡាប់កាលពីថ្ងៃចុងសប្តាហ៍ នៅក្នុង ឧបទ្ទវហេតុដែលបណ្តាលឱ្យមនុស្សពីរនាក់ស្លាប់។

ទូកដែលមានសមាជិកយ៉ាងហោចណាស់ ៣៥នាក់ បានលិចកាលពីថ្ងៃសៅរ៍នៅក្នុងដែនទឹកនៃកោះ ដាច់ស្រយាល Selayar ក្នុងខេត្ត South Sulawesi ដែលក្រោយមកមនុស្ស១១ នាក់ ត្រូវបានគេ រកឃើញជាប់នៅលើកោះចំនួនពីរដាច់ដោយឡែកពីគ្នា បន្ទាប់ពីរសាត់អណ្តែត លើសមុទ្រអស់ រយៈ ពេលបីថ្ងៃ។

យោងតាមទីភ្នាក់ងារស្វែងរកនិងសង្គ្រោះក្នុងតំបន់បានឲ្យដឹងថា ទូករបស់ពួកគេ បានក្រឡាប់ដោយសារ អាកាសធាតុមិនអំណោយផលក្នុងរដូវវស្សានៅប្រទេសឥណ្ឌូណេស៊ី។ មន្ត្រីរដ្ឋាភិបាលក្នុងតំបន់ បានប្រាប់សារព័ត៌មាន AFP នៅថ្ងៃពុធនេះថា សមាជិកនាវិក បានបណ្តែតខ្លួននៅលើសមុទ្រអស់រយៈ ពេលបីថ្ងៃ ពួកគេត្រូវបានហូរនាំតាមចរន្តទៅកាន់កោះ Selayar។

ទូកនេសាទនេះ បានចាកចេញពីកំពង់ផែទីក្រុងហ្សាកាតាខាងជើង កាលពីថ្ងៃទី ៣ ខែមីនា ទៅកាន់កោះ Lombok ក្នុងខេត្ត West Nusa Tenggara។ កងទ័ពជើងទឹក និងអ្នកស្ម័គ្រចិត្តជួយសង្គ្រោះ កំពុងជួយក្នុងកិច្ចប្រឹងប្រែងស្វែងរកអ្នកបាត់ខ្លួន។

ទីភ្នាក់ងារព័ត៌មានរដ្ឋ Antara បានរាយការណ៍ថា អ្នកនៅរស់រានជីវិត ត្រូវបានរកឃើញ បន្ទាប់ពីអ្នកនេសាទក្នុងតំបន់បានប្រទះឃើញពួកគេ និងបានផ្តល់ដំណឹងដល់អាជ្ញាធរ។