ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) កាលពីថ្ងៃអង្គារ (ទី១២ ខែមីនា) បានឲ្យដឹងថា កុមារកាន់តែច្រើនឡើងៗត្រូវបានរាយការណ៍ថា ត្រូវបានសម្លាប់នៅក្នុងភ្លើងសង្គ្រាមដែលកំពុងឆាបឆេះនៅតំបន់ហ្កាហ្សា ពោលគឺជាចំនួនច្រើនជាងក្នុងជម្លោះរយៈពេល ៤ឆ្នាំ នៅជុំវិញពិភពលោក។

តាមរយៈបណ្ដាញសង្គម X (ពីមុនជា Twitter) ប្រធាន UNRWA លោក Philippe Lazzarini បានប្រាប់ថា៖ «ពិតជាគួរឲ្យភ្ញាក់ផ្អើលខ្លាំងណាស់។ ចំនួនកុមារដែលត្រូវបានរាយការណ៍ថា ត្រូវបានសម្លាប់ក្នុងរយៈពេលជាង ៤ខែនៅតំបន់ហ្កាហ្សា គឺខ្ពស់ជាងចំនួនកុមារដែលត្រូវបានសម្លាប់ នៅក្នុងសង្គ្រាមរយៈពេល ៤ឆ្នាំ ជុំវិញពិភពលោក រួមបញ្ចូលគ្នា»។

ការបង្ហោះរបស់លោកនេះ បានយោងតាមចំនួនរបស់អង្គការសហប្រជាជាតិដែលបង្ហាញថា កុមារ ១២.១៩៣នាក់ ត្រូវបានសម្លាប់នៅក្នុងជម្លោះទូទាំងពិភពលោក រវាងឆ្នាំ២០១៩ និងឆ្នាំ២០២២។ ចំនួននោះបានប្រៀបធៀបជាមួយនឹងរបាយការណ៍របស់ក្រសួងសុខាភិបាល នៅក្នុងតំបន់ហ្កាហ្សាដែលគ្រប់គ្រងដោយក្រុមហាម៉ាស ដោយរបាយការណ៍នោះបង្ហាញថា កុមារជាង ១២.៣០០នាក់ បានស្លាប់ នៅក្នុងទឹកដីប៉ាឡេស្ទីន ចន្លោះខែតុលាឆ្នាំមុន ដល់ចុងខែកុម្ភៈ។

លោក Lazzarini បានលើកឡើងតាមរយៈសារនោះថា៖ «សង្គ្រាមនេះ គឺជាសង្គ្រាមលើកុមារ។ វាជាសង្គ្រាមលើកុមារភាព និងអនាគតរបស់ពួកគេ»។

គួរបញ្ជាក់ថា សង្រ្គាមបង្ហូរឈាមនេះ បានចាប់ផ្តើមកកើតឡើង ដោយសារមានការវាយប្រហារមិននឹកស្មានដល់ដោយក្រុមហាម៉ាស់ កាលពីថ្ងៃទី៧ ខែតុលា ដែលបានបណ្តាលឲ្យមនុស្សប្រហែល ១.១៦០នាក់បានស្លាប់នៅប្រទេសអ៊ីស្រាអែល ដែលភាគច្រើន គឺជាជនស៊ីវិល ហើយក្រុមនោះបានចាប់ចំណាប់ថ្នូរប្រមាណជា ២៥០នាក់ ដែលរាប់សិបនាក់ត្រូវបានដោះលែង អំឡុងពេលមានបទឈប់បាញ់ ១សប្ដាហ៍ កាលពីខែវិច្ឆិកា។ បើយោងតាមក្រសួងសុខាភិបាលនៃដែនដីនេះ បានឲ្យដឹងថា ការទម្លាក់គ្រាប់បែក និងការវាយលុកសងសឹករបស់អ៊ីស្រាអែល បានសម្លាប់ជនជាតិប៉ាឡេស្ទីនចំនួន ៣១.១៨៤នាក់ នៅតំបន់ហ្កាហ្សា ដែលភាគច្រើនជាស្ត្រី និងកុមារ៕