ឯកឧត្តម សួនសេរីរដ្ឋា រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ឆាយ ឬទ្ធិសែន រដ្ឋមន្ត្រី​ក្រសួង​អភិវឌ្ឍន៍​ជនបទ បានដឹកនាំប្រតិភូ​ក្រសួង​ជួប​ប្រជុំ​ពង្រឹង​ការ​អនុវត្ត​ផែនការសកម្មភាព និង​ផែន​ការ​​ថវិកា លើការងារអភិវឌ្ឍន៍ និងអភិរក្ស​ជន​ជាតិ​ដើម​ភាគ​តិច នៅខេត្តឧត្ដរមានជ័យ និងខេត្តព្រះវិហារ នាថ្ងៃទី១២ និងទី១៣ ខែមីនា ឆ្នាំ២០២៤។

កិច្ចប្រជុំមានការចូលរួមអមដំណើរដោយ លោក អគ្គនាយករង រដ្ឋបាល និងហិរញ្ញវត្ថុ-លោកស្រី​ប្រធាន​នាយកដ្ឋាន និងក្រុមការងារនាយកដ្ឋានអភិវឌ្ឍន៍ជនជាតិភាគតិច នៃក្រសួងអភិវឌ្ឍន៍​ជនបទ​ និងមានការចូលរួមប្រជុំផ្ទាល់ដោយលោកប្រធានមន្ទីរខេត្ត -តំណាងមន្ទីរសេដ្ឋកិច្ច និង​ហិរញ្ញ​វត្ថុ​ខេត្ត-ថ្នាក់ដឹកនាំ និងមន្ត្រី នៃមន្ទីរអភិវឌ្ឍន៍ជនបទខេត្ត ។

កិច្ចប្រជុំនេះធ្វើឡើង ដើម្បីស្វែងយល់ពីការងារ កិច្ចសហប្រតិបត្តិការរវាងមន្ទីរទាំង ២ កន្លង​មក​ដើម្បី​រក​ចំណុចខ្លាំង ចំណុចខ្សោយលើការងារការអនុវត្តន៍ផែនការសកម្មភាព ការស្នើ​ថវិកា​ចំណាយ ចំពោះសកម្មភាពការងារជនជាតិដើមភាគតិចនៅក្នុងខេត្ត។ ក្រោយស្តាប់​របាយការណ៍​របស់​មន្ទីររួចមក ឯកឧត្តមរដ្ឋលេខាធិការ បានសម្តែងនូវការកោដសរសើរចំពោះថ្នាក់ដឹកនាំមន្ទីរ ដែល​កន្លងមកបានសហការគ្នាធ្វើការបានលទ្ធផលប្រសើរ និងបានណែនាំបន្ថែមក្នុងការបំពេញ​ការងារ​ដោយត្រូវសិក្សាកែតម្រូវលើចំណុច ខ្វះខាត និងត្រូវបំពេញបន្ថែម អនុវត្ត ដោយយក​ចិត្ត​ទុក​ដាក់​ដល់សហគមន៍ជនជាតិដើមភាគតិចដែលមាន និងបាន​ទទួល​បាន​ការទទួល​ស្គាល់​អត្ត​សញ្ញាណ​ពី​ក្រសួង​រួចហើយ។ ផ្សព្វផ្សាយពីកម្មវិធីទី៣ ការធ្វើពិពិធកម្មសេដ្ឋកិច្ចជនបទ ដែលមាន ៤ នាយកដ្ឋានពាក់ព័ន្ធ ក្នុងនោះមាននាយកដ្ឋានអភិវឌ្ឍន៍ជនជាតិដើមភាគតិចផងដែល៖ ១.ការកំណត់អត្តសញ្ញាណជនជាតិដើមភាគតិច, ២.ការរៀបចំសហគមន៍គំរូរបស់ជនជាតិដើមភាគតិច, ៣.មជ្ឈមណ្ឌលវប្បធម៌ជនជាតិដើមភាគតិច ។

ឯកឧត្តមរដ្ឋលេខាធិការ បានផ្តាំផ្ញើរដល់ថ្នាក់ដឹកនាំមន្ទីរ និងមន្ត្រី​រាជការ​ខិតខំ​បំពេញ​ការងារ​ស្រប​តាម​ផែនការ​យុទ្ធសាស្ត្ររបស់ក្រសួងអភិវឌ្ឍន៍ជនបទ និងផ្សព្វផ្សាយ​ពីកម្ម​វិធី​ទាំង​០៤​របស់​ក្រសួង​ដល់​មន្ត្រីរាជការក្នុងអង្គភាពអោយបានយល់ច្បាស់ ។

បន្ទាប់មកឯកឧត្តមរដ្ឋលេខាធិការ និងប្រតិភូអមដំណើរ បានចុះសំណេះសំណាល និងស្វែង​យល់​ពី​តម្រូវ​ការរបស់បងប្អូនជនជាតិដើមភាគតិចផងដែរ។

ឯកឧត្តម​រដ្ឋលេខាធិការ ក៏បានបញ្ជាក់បន្ថែម ផងដែរពីកិច្ចប្រជុំនេះគឺដើម្បីជជែកអំពីតួនាទី ភារកិច្ច​រវាងនាយកដ្ឋានអភិវឌ្ឍន៍ជនជាតិភាគតិច និងមន្ទីរអភិវឌ្ឍន៍ជនបទខេត្ត ក្នុងការ​អនុវត្ត​សកម្មភាព ដំណើរការចុះកំណត់អត្តសញ្ញាណ ប្រជាពលរដ្ឋជនជាតិដើមភាគតិច ដែល​នៅ​សេស​សល់ និងការវិភាគថវិការបស់មន្ទីរ ដល់ការិយាល័យអភិវឌ្ឍន៍ជនជាតិដើមភាគតិច និង​ការ​ទូទាត់​ថវិកា​កម្មវិធី ទៅមន្ទីរសេដ្ឋកិច្ច និងហិរញ្ញវត្ថុខេត្ត៕