នៅក្នុងសុន្ទរកថាដែលបានចេញផ្សាយនៅថ្ងៃពុធ (ទី១៣ ខែមីនា) នេះ ប្រធានាធិបតីរុស្ស៊ី លោក Vladimir Putin បានលើកឡើងថា ប្រទេសរបស់លោកមិនជ្រៀតជ្រែកក្នុងការបោះឆ្នោតណាមួយឡើយ ហើយនឹងធ្វើការជាមួយមេដឹកនាំរូបណាក៏បាន ដែលប្រជាជនអាមេរិកបោះឆ្នោតជ្រើសរើស។

នៅក្នុងបទសម្ភាសន៍ដ៏ទូលំទូលាយមួយជាមួយប្រព័ន្ធផ្សព្វផ្សាយរដ្ឋរុស្ស៊ី លោក Putin បានប្រាប់ថា៖ «យើងមិនជ្រៀតជ្រែកតាមមធ្យោបាយណាមួយនៅក្នុងការបោះឆ្នោតណាមួយឡើយ។ ដូចដែលខ្ញុំបាននិយាយដដែលៗច្រើនដងរួចមកហើយថា យើងនឹងធ្វើការជាមួយមេដឹកនាំណាក៏បាន ដែលទទួលបានទំនុកចិត្តពីប្រជាជនអាមេរិក ពោលគឺពីអ្នកបោះឆ្នោតអាមេរិក»។

សង្គ្រាមនៅអ៊ុយក្រែន និងការអះអាងរបស់សហរដ្ឋអាមេរិកដែលថា រុស្ស៊ីមានផែនការដាក់អាវុធនុយក្លេអ៊ែរនៅក្នុងលំហអាកាស បាននាំឲ្យមានវិបត្តិដ៏ធំបំផុតក្នុងទំនាក់ទំនង រវាងរុស្ស៊ី និងលោកខាងលិច គិតចាប់តាំងពីសម័យសង្គ្រាមត្រជាក់មក។

លោក Putin បាននិយាយថា លោក Donald Trump ពេលធ្វើជាប្រធានាធិបតី បានស្តីបន្ទោសលោកថា មាន «ក្ដីអាណិតអាសូរ» ចំពោះលោក Joe Biden ដែលជាប្រធានាធិបតីនាពេលឥឡូវនេះ។ នៅមុននេះ កាលពីខែកុម្ភៈ លោក Putin បាននិយាយថា លោកចង់ឲ្យលោក Biden កាន់តំណែងប្រធានាធិបតីអាមេរិក ដោយនិយាយថា លោក Biden មានបទពិសោធន៍ និងអាចទស្សន៍ទាយបានច្រើនជាង៕