នាយកស៊ើបការណ៍សម្ងាត់ជាតិអាមេរិក លោកស្រី Avril Haines បានប្រាប់អង្គសវនាការរបស់គណៈកម្មាធិការស៊ើបការណ៍សម្ងាត់សភា កាលពីថ្ងៃអង្គារ (ទី១២ ខែមីនា) ថា ប្រទេសចិនអាចប្រើកម្មវិធីបណ្ដាញសង្គម TikTok ដើម្បីមានឥទ្ធិពលលើការបោះឆ្នោត នៅសហរដ្ឋអាមេរិកឆ្នាំ២០២៤។

នៅពេលត្រូវបានសួរដោយតំណាងរាស្ត្ររបស់គណបក្សប្រជាធិបតេយ្យ លោក Raja Krishnamoorthi ថា តើបក្សកុម្មុយនីស្តដែលកំពុងកាន់អំណាចរបស់ប្រទេសចិន (CCP) នឹងប្រើប្រាស់បណ្ដាញសង្គម TikTok ដើម្បីមានឥទ្ធិពលលើការបោះឆ្នោតដែរ ឬទេ លោកស្រី Haines បានឆ្លើយថា៖ «យើងមិនអាចបដិសេធបាននោះឡើយថា CCP នឹងប្រើប្រាស់បណ្ដាញសង្គមនេះ»។

លោក Krishnamoorthi និងប្រធានគណបក្សសាធារណរដ្ឋលោក Mike Gallagher កាលពីសប្តាហ៍មុនបានលើកឡើងនូវសេចក្ដីស្នើច្បាប់ដែលនឹងផ្ដល់ឲ្យម្ចាស់បណ្ដាញសង្គម TikTok គឺក្រុមហ៊ុនរបស់ចិន ByteDance នូវរយៈពេលប្រហែល ៦ខែ ដកចេញកម្មវិធីវីដេអូខ្លីៗដែលប្រើប្រាស់ដោយជនជាតិអាមេរិក ១៧០លាននាក់។

សភាគ្រោងនឹងបោះឆ្នោតនៅថ្ងៃទី១៣ ខែមីនានេះ ក្រោមច្បាប់ពន្លឿនដែលទាមទារឲ្យសមាជិក ២ភាគ៣បោះឆ្នោត «Yes» (យល់ព្រម) សម្រាប់វិធានការដើម្បីទទួលបានការអនុម័ត។ លោកប្រធានាធិបតីលោក Joe Biden បាននិយាយកាលពីសប្តាហ៍មុនថា លោកនឹងចុះហត្ថលេខាលើសេចក្ដីស្នើច្បាប់នេះឲ្យក្លាយជាច្បាប់ធរមាន តែកម្មវិធីនេះមានប្រជាប្រិយភាពណាស់ ហើយការទទួលបានការអនុម័តពីសភា និងព្រឹទ្ធសភា ក្នុងឆ្នាំបោះឆ្នោតបែបនេះ ទំនងជាពិបាក។

គួរបញ្ជាក់ថា ការវាយតម្លៃពីការគំរាមកំហែងប្រចាំឆ្នាំ២០២៤ នៃសហគមន៍ស៊ើបការណ៍សម្ងាត់អាមេរិក ដែលចេញផ្សាយកាលពីថ្ងៃចន្ទ (ទី១១ ខែមីនា) បានឲ្យដឹងថា គណនី TikTok ត្រូវបានដំណើរការជាអាវុធឃោសនារបស់រដ្ឋាភិបាលចិន ដែលតាមសេចក្តីរាយការណ៍បានកំណត់គោលដៅបេក្ខជនមកពីគណបក្សនយោបាយទាំង២ អំឡុងពេលនៃការបោះឆ្នោតពាក់កណ្តាលអាណត្តិរបស់សហរដ្ឋអាមេរិក ក្នុងឆ្នាំ២០២២៕