នាយករដ្ឋមន្ត្រីប្រទេសអ៊ីតាលី លោកស្រី Giorgia Meloni បាននិយាយកាលពីថ្ងៃអង្គារថា រដ្ឋាភិបាល នឹងបង្កើតមូលនិធិវិនិយោគដែលមានតម្លៃ ១ ពាន់លានអឺរ៉ូ ឬ១,១ ពាន់លានដុល្លារអាមេរិក ដើម្បីជំរុញ ការអភិវឌ្ឍបញ្ញាសិប្បនិម្មិត (AI) ។

ថ្លែងតាមរយៈបណ្តាញវីដេអូនៅក្នុងកិច្ចប្រជុំស្តីពី «បញ្ញាសិប្បនិម្មិតសម្រាប់ប្រទេសអ៊ីតាលី» នៅទីក្រុង រ៉ូម លោកស្រី Meloni បាននិយាយថា មូលនិធិនេះនឹងបានមកពីអង្គភាពបណ្តាក់ទុនរបស់ក្រុមហ៊ុន Cassa Depositi e Prestiti ជាអ្នកផ្តល់ប្រាក់កម្ចីរបស់រដ្ឋ។

លោកស្រីនិយាយថា វានឹងត្រូវបានដំណើរការ ដោយភ្ជាប់ជាមួយនឹងច្បាប់ របស់ប្រទេស អ៊ីតាលី ដែលពុំទាន់បញ្ជាក់ចុងក្រោយលើ បញ្ញាសិប្បនិម្មិត(AI) ក្នុងបំណងគ្រប់គ្រងបច្ចេកវិទ្យា ថ្មីនេះ។

លោកស្រី Meloni បាននិយាយថា រដ្ឋាភិបាលកំពុងរៀបចំច្បាប់ថ្មីមួយ ដែលនឹងបង្កើតគោលការណ៍ និងកំណត់ច្បាប់ ដែលបំពេញបន្ថែមចំពោះបទប្បញ្ញត្តិរបស់សហភាពអឺរ៉ុប និងកំណត់វិធានការដ៏មាន ប្រសិទ្ធភាពបំផុតដើម្បីជំរុញសមត្ថភាពផលិតភាពរបស់យើង។

លោកស្រីនិយាយថា រដ្ឋាភិបាលនៅពុំទាន់សម្រេចថាតើ អង្គភាពណានឹងត្រួតពិនិត្យបទប្បញ្ញត្តិ នៃបច្ចេកវិទ្យា ដែលផ្អែកលើបញ្ញាសិប្បនិម្មិត (AI)នេះ នៅឡើយ។