ប្រធានាធិបតីរុស្ស៊ីលោក Vladimir Putin និយាយនៅក្នុងសេចក្តីអត្ថាធិប្បាយចុះផ្សាយនៅថ្ងៃពុធនេះថា ការចូលរួមសម្ព័ន្ធយោធាណាតូរបស់ហ្វាំងឡង់ និងស៊ុយអែត គឺជាជំហានគ្មានន័យ ហើយរុស្ស៊ី នឹងដាក់ពង្រាយទាហាន ហើយនិងប្រព័ន្ធវាយប្រហារទៅកាន់ព្រំដែនហ្វាំងឡង់ ក្រោយប្រទេសមួយនេះ ចូលជាសម្ព័ន្ធមិត្តណាតូ ។

អំឡុងបទសម្ភាសន៍ជាមួយទីភ្នាក់ងារព័ត៌មានរដ្ឋ RIA និងទូរទស្សន៍រដ្ឋ Rossiay-1 លោក Putin និយាយថា នេះគឺជាជំហានគ្មានន័យពិតប្រាកដសម្រាប់ហ្វាំងឡង់ និងស៊ុយអែត ក្នុងទស្សនៈធានាដល់អត្ថប្រយោជន៍ជាតិរបស់ពួកគេ ។

លោកថា ពួកយើងគ្មានទាហាននៅព្រំដែនហ្វាំងឡង់នោះទេ ប៉ុន្តែឥឡូវទាហាននឹងឈរជើងនៅទីនោះ ។ ឥឡូវគ្មានប្រព័ន្ធវាយប្រហារនៅទីនោះទេ ប៉ុន្តែឥឡូវ វានឹងមាននៅទីនោះ ។

លោក Putinនិយាយដែរថា រុស្ស៊ី នៅតែត្រៀមខ្លួនប្រយុទ្ធ និងត្រៀមខ្លួនជាស្រេចសម្រាប់សង្គ្រាមនុយក្លេអ៊ែរ ប្រសិនបើអធិបតេយ្យភាពត្រូវបានគំរាមកំហែង ប៉ុន្តែមិនប្រញាប់ទេនៅពេលនេះ ។ 

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋ លោក ពូទីន ដែលស្ទើរតែប្រាកដក្នុងការឈ្នះការបោះឆ្នោតប្រធានាធិបតីពីថ្ងៃទី ១៥ ដល់ថ្ងៃទី ១៧ ខែមីនាខាងមុខនេះ បាននិយាយថា រុស្ស៊ីនឹងត្រៀមខ្លួនជាស្រេចក្នុងការប្រើប្រាស់អាវុធនុយក្លេអ៊ែរ ក្នុងលក្ខខណ្ឌណាមួយដែលអធិបតេយ្យភាពរបស់ខ្លួនត្រូវបានរំលោភបំពាន ៕