កំពង់ឆ្នាំង៖ ប្រជាពលរដ្ឋក្នុងស្រុកសាមគ្គីមានជ័យ ខេត្តកំពង់ឆ្នាំង បានសំដែងនូវការដឹងគុណ និងសប្បាយចិត្តជាខ្លាំងចំពោះសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី ដោយពួកគាត់ទទួលបានផ្លូវកៅស៊ូចំនួន៤ខ្សែថ្មីសន្លាង ដែលផ្លូវទាំងនោះពីមុនផ្លូវទាំងនេះជាផ្លូវក្រាលគ្រួសក្រហមហុយដីនៅរដូវប្រាំង និងមានភក់នៅរដូវវស្សា ។ ពេលនេះ ពួកគាត់លែងព្រួយបារម្ភពីបញ្ហាសុខភាពដោយសារធូលីហុយទៀតហើយ ព្រោះផ្លូវទាំងនោះបានក្លាយជាផ្លូវកៅស៊ូ មានប្រព័ន្ធអគ្គីសនី និងមានទឹកស្អាតប្រើប្រាស់មិនចាញ់ទីក្រុងឡើយ។

 ប្រជាពលរដ្ឋស្រុកសាមគ្គីមានជ័យបញ្ជាក់ថា៖ កាលពីមុនផ្លូវទាំងនេះ ជាផ្លូវរទេះកាត់ស្រែ កាត់ព្រៃ ក្រោយមកទៀតរាជរដ្ឋាភិបាលបានប្រែក្លាយផ្លូវទាំងនោះទៅជាផ្លូវក្រាលគ្រួសក្រហម ក៏ប៉ុន្តែផ្លូវនេះ ហុយខ្លាំងនៅរដូវប្រាំង និងមានទឹកដក់បែកភក់នៅរដូវវស្សា ធ្វើអោយប្រជាពលរដ្ឋពិបាកធ្វើដំណើរ។ ក្រោយពីឃើញភាពលំបាករបស់ប្រជាពលរដ្ឋ ប្រមុខរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បានប្រែក្លាយផ្លូវទាំងអស់នោះទៅជាផ្លូវកៅស៊ូDBSTប្រវែងជាង៣៦គីឡូម៉ែត្រ បានកសាងស្ពានថ្មី ដាក់លូប្រអប់ និងលូមូល នាំប្រជាពលរដ្ឋក្នុងស្រុកសាមគ្គីមានជ័យទាំងអស់អាចធ្វើដំណើរទៅមកបានងាយស្រួលទាំងទៅមណ្ឌលសុខភាព ទៅវត្តអារាម ទៅមកសាលារៀន ងាយស្រួលក្នុងការដឹកកសិផល និងមន្ត្រីរាជការទៅមកធ្វើការជាដើម។

លោក ឈួន ចាន់ណា អភិបាលស្រុកសាមគ្គីមានជ័យបានថ្លែងថា៖ គម្រោងកែលម្អផ្លូវជនបទជំហាន៣នេះ បានចាប់ផ្តើមសាងសង់ពីថ្ងៃទី០១ ខែវិច្ឆកា ឆ្នាំ២០២១ ជាគម្រោងរបស់រាជរដ្ឋាភិបាលកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី តាមរយៈក្រសួងអភិវឌ្ឍន៍ជនបទដោយប្រើប្រាស់ថវិការបស់រាជរដ្ឋាភិបាលកម្ពុជា ក្នុងគោលបំណងជួយសម្រួលការធ្វើចរាចររបស់ប្រជាពលរដ្ឋ ចំណេញពេលវេលា ងាយស្រួលធ្វើដំណើរទៅមកទាំងប្រជាពលរដ្ឋ កម្មករកម្មការនី សិស្សានុសិស្ស មន្ត្រីរាជការ រួមនិងការដឹកកសិផលផងដែរ។ ស្រុកសាមគ្គីមានជ័យទទួលបានការកសាងផ្លូវកៅស៊ូ DBST ចំនួន៤ខ្សែប្រវែងជាង៣៦គីឡូម៉ែត្រ សាងសង់ស្ពានថ្មីចំនួន៨កន្លែង សាងសង់លូប្រអប់ចំនួន១១កន្លែង និងដាក់លូមូលចំនួន៥៧កន្លែង។ គម្រោងកែលម្អផ្លូវជនបទជំហាន៣នេះកសាងបានប្រមាណជាង៧០%ហើយ គ្រោងបញ្ចប់ការសាងសង់នៅថ្ងៃទី១៧ ខែមិថុនា ឆ្នាំ២០២៤ខាងមុខនេះ ។

ក្នុងគម្រោងកែលម្អផ្លូវជនបទជំហាន៣ទាំង៤ខ្សែនេះ រដ្ឋបាលខេត្តកំពង់ឆ្នាំង និងរដ្ឋបាលស្រុកសាមគ្គីមានជ័យ បានដាក់ប្រព័ន្ធអគ្គិសនី និងប្រេព័ន្ធទឹកស្អាតនៅតាមបណ្តោយផ្លូវទាំងនោះរួចជាស្រេច ដែលរឹតតែផ្តល់ភាពងាយស្រួលដល់ជិវភាពប្រចាំថ្ងៃរបស់ប្រជាពលរដ្ឋ ជួយដល់សុខភាព សន្សំសំចៃថវិកាក្នុងគ្រួសារ ចំណេញពេលវេលា និងងាយស្រួលក្នុងការប្រាស្រ័យទាក់ទងគ្នាផងដែរ ៕ ដោយ ៖ កាំង ហុងវាស្នា