​ប្រណាំង​កង់៖ កីឡាករ​អូទ្រីស Patrick Konrad របស់​ក្រុម​ប្រណាំង BORA-Hansgrohe បាន​ប្រជែង​ឈ្នះ​ដំណាក់កាល​ទី ១៦ នៃ​ការប្រកួតប្រណាំង​កង់ Grand Tour, Tour de France ខណៈ​អ្នកការពារ​តំណែង​ជើងឯក Tadej Pogacar នៅតែ​បន្ត​នាំមុខ​ដដែល​។

​​ដំណាក់កាល​ទី ១៦ ថ្ងៃ​អង្គារ​ម្សិលមិញ​នេះ​មាន​ចម្ងាយ​ផ្លូវ ១៦៩​គីឡូម៉ែត្រ ជា​ដំណាក់កាល​ឆ្លងកាត់​ស្ថានភាព​ផ្លូវ​ភ្នំ Patrick Konrad បានមក​ដល់ទី​ព្រ័ត្រ​មុនគេ​ប្រើពេល ៤ម៉ោង ១នាទី ៥៩វិនាទី តាម​ពីក្រោយ​ដោយ​កីឡាករ​អ៊ីតាលី Sonny Colbrelli យឺត​ជាង ៤២វិនាទី និង​លេខ៣ កីឡាករ​អូស្ត្រាលី Michael Matthew យឺត​ជាង ៤២វិនាទី​ដូចគ្នា​។​ ​​យ៉ាងណាក្តី​អ្នកការពារ​តំណែង​ជើងឯក​កីឡាករ​ស្លូ​វេ​នី Tadej Pogacar នៅតែ​បន្ត​គ្រប់គ្រង​តារាង​វេលា​រួម​ដដែល​ក្រោយ​ឆ្លងកាត់ ១៦ដំណាក់កាល​នេះ​ដោយមាន​វេលា​សរុប ៦៦ម៉ោង ២៣នាទី ៦វិនាទី​។

​​កីឡាករ​កូ​ឡុំ​ប៊ី Rigoberto Uran របស់​ក្រុម EF Education ឈរ​លេខ២ ក្នុង​តារាង​រួម​ដេញ​ពីក្រោយ ៥នាទី ១៨វិនាទី និង​លេខ៣ កីឡាករ​ដា​ណឺ​ម៉ាក Jonas Vingegaard របស់​ក្រុម Jumbo យឺត​ជាង ៥នាទី ៣២វិនាទី​។ ដំណាក់កាល​ទី ១៧ ថ្ងៃនេះ​មាន​ចម្ងាយ​ផ្លូវ ១៧៨.៤​គីឡូម៉ែត្រ ឆ្លងកាត់​ស្ថានភាព​ផ្លូវ​ឡើង​ភ្នំ​ផងដែរ​។ ​ព្រឹត្តិការណ៍ Tour de France លើក​ទី ១០៨ ឆ្នាំ២០២១ នេះ​នឹង​បញ្ចប់​នៅ​ថ្ងៃអាទិត្យ​ចុង​សប្តាហ៍​នេះហើយ ​នៅមហាវិថី​ហ្ស​ង់​អេ​លី​ហ្សេ​ទីក្រុង​ប៉ារីស​ប្រទេស​បារាំង​៕

​អត្ថបទ​៖​នាង សុភា​វុ​ធ