វិទ្យាល័យមួយចំនួន កំពុងមមាញឹកត្រៀមរៀបចំសង្ក្រាន្តវិទ្យាល័យ ដើម្បី​អបអរ​សាទរ​ពិធី​បុណ្យ​ចូល​ឆ្នាំ​ប្រពៃណី​ជាតិខ្មែរ ក្នុងនោះវិទ្យាល័យជាស៊ីមសាមគ្គីបន្តរៀបចំ សង្ក្រាន្តវិទ្យាល័យជាថ្មី ក្នុង​ឆ្នាំ​២០២៤នេះ ដោយក្រុមយុវជន កំពុងហាត់សមទាំងរបាំ ចង្វាក់រាំ ក៏ដូចជាល្បែងប្រជាប្រិយ ដើម្បី​លើកយកមកបង្ហាញផ្ដល់ភាពសប្បាយរីករាយ និងផ្សព្វផ្សាយ​ពីវប្បធម៌​ប្រពៃណីជាតិ​ទៅ​កាន់​យុវជន​។

រយៈពេលប្រមាណ ២ខែ រួចមកហើយ ដែលក្រុមយុវជន នៅវិទ្យាល័យជាស៊ីមសាមគ្គី ចាប់​ផ្ដើម​ហ្វឹក​ហាត់​សម ការរាំរបាំ ក៏ដូចជាការហាត់រាំចង្វាក់ប្រពៃណីជាតិខ្មែរ ការលេងល្បែងប្រជាប្រិយ និង​ការ​សម្ដែងនានា សម្រាប់ផ្ដល់ជាទស្សនីយភាព ជូនអ្នកចូលរួម ពិសេសយុវជន ក្នុង​ព្រឹត្តិការណ៍​​សង្ក្រាន្ត​វិទ្យាល័យ ថ្ងៃទី៣០ ទី៣១ ខែមីនាខាងមុខ។

យុវជន ម៉ៃ សំណាង ជាប្រធានក្រុមអ្នករៀបចំសង្ក្រាន្តវិទ្យាល័យជាស៊ីមសាមគ្គី លើកឡើងថា សង្ក្រាន្ត​ឆ្នាំនេះ​ រៀបចំឡើងក្រោមប្រធានបទ «សង្ក្រាន្តយុវជនដើម្បីវប្បធម៌»។ ការរៀប​ចំ​ការ​សម្ដែង ​គឺជាការស្ម័គ្រចិត្តរបស់ យុវជន ជាអតីតសិស្ស និងជាសិស្ស​កំពុង​សិក្សា​នៅ​វិទ្យាល័យ​ជា​ស៊ីម​សាមគ្គី។ ក្នុងព្រឹត្តិការណ៍សំខាន់ខាងមុខ ក្រៅពីការសម្ដែងរបស់ក្រុមយុវជន ក៏នឹង​មាន​វត្តមាន​របស់ព្រឹទ្ធាចារ្យសិល្បៈ គង់ ណៃ ចូលរួមផងដែរ។

ចំពោះការហ្វឹកហាត់កំឡុងពេលនេះ ទាំងការរាំល្បុក្កតោម៉ាឌីហ្សុន ក៏ដូចជាការហ្វឹកហាត់របាំ និង​ចង្វាក់រាំ គឺមានការរៀបចំជាក្រុម និងមានការរៀបចំជាឈុតឆាកសម្ដែងផ្សេងៗគ្នា។ យុវជន​ជា​អ្នក​មាន​ចំណេះ​ដឹង ធ្លាប់ឆ្លងកាត់ការបណ្ដុះបណ្ដាល ធ្វើជាប្រធាន​ក្រុម​ដោយ​បង្ហាត់​តជូន​ដល់​យុវជន​ផ្សេង​ទៀត។ ពួកគេលើកឡើងជាសប្បាយចិត្ត ដែលយុវជនមានការចាប់អារម្មណ៍ចូលរួម ការ​ហ្វឹកហាត់ដើម្បីត្រៀមសម្ដែងជូនក្នុងពិធីសង្ក្រាន្តវិទ្យាល័យនាពេលខាងមុខ។ ពួក​គេ​ក៏​សំណូម​ពរ​ឱ្យប្រជាពលរដ្ឋ ពិសេសយុវជនចូលរួមស្វែងយល់ ទទួលបានចំណេះដឹង ភាព​សប្បាយ​រីករាយ​ឱ្យ​កុះករ​ផងដែរ។

សង្ក្រាន្តវិទ្យាល័យ តាមសាលារៀននីមួយៗរៀបចំក្នុងគោលដៅសំខាន់រួមមួយ គឺផ្ដល់​ភាព​សប្បាយ​រីករាយ និងការសាទរនៃការចូលមកដល់នៃពិធីបុណ្យប្រពៃណីជាតិខ្មែរ។ ការរៀប​ចំ​គឺ​អាច​ធ្វើឡើង​ថ្ងៃផ្សេងៗគ្នា ទៅតាមសាលានីមួយៗ។ ជាក់ស្ដែងដូចនៅសាលាជាស៊ីមសាមគ្គី សម្រេច​រៀបចំឡើងក្នុងរយៈពេល ២ថ្ងៃ គឺនៅថ្ងៃទី៣០ និងថ្ងៃទី៣១ ខែមីនា ឆ្នាំ២០២៤៕ អត្ថបទ៖ គឹម ហុក