នៅក្នុងឱកាសទទួលស្វាគមន៍គណៈប្រតិភូរដ្ឋសភា ដឹកនាំដោយ ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា (គណៈកម្មការទី៧) នៅព្រឹកថ្ងៃទី១៤ ខែមីនា ឆ្នាំ២០២៤ ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្តឧត្តរមានជ័យ និងឯកឧត្តម ឃិន ញ៉ាណ អភិបាលខេត្តស្តីទី បានមានប្រសាសន៍ឱ្យដឹងថា នៅខេត្តឧត្តរមានជ័យ មានគ្រឹះស្ថានសាធារណៈចំនួន៣១ទីតាំងគ្រប់កម្រិត ស្មើនឹង៦៩១បន្ទប់ សិស្សសរុបចំនួន១១១.៣៨២នាក់ និងគ្រឹះស្ថានឯកជនចំនួន២១ទីតាំង មានសិស្សនិស្សិតចំនួន១.១១៦នាក់។ រីឯលទ្ធផលប្រឡងមធ្យមសិក្សាទុតិយភូមិក្នុងឆ្នាំសិក្សា២០២២-២០២៣ មានបេក្ខជនសរុប ១.៧០៨នាក់ បានប្រឡងជាប់ ចំនួន១៣៧៤នាក់ ជាប់និទ្ទេសAចំនួន៦នាក់។
ចំពោះវិស័យទេសចរណ៍ ខេត្តទទួលបានភ្ញៀវទេសចរណ៍សរុបនៅឆ្នាំ២០២៣ មានចំនួន ២៤២.២១៤នាក់ ក្នុងនោះភ្ញៀវស្នាក់នៅមានចំនួន៣៩.៩១៩នាក់ និងភ្ញៀវមកកម្សាន្តតាមគោលដៅទេសចរណ៍មានចំនួន១៩៣.៣៨៤នាក់។
ថ្នាក់ដឹកនាំ និងមន្ទីរជុំវិញខេត្តបានបន្តថា រមណីយដ្ឋាន និងគោលដៅទាក់ទាញភ្ញៀវទេសចរមានដូចជា៖ រមណីយដ្ឋានប្រវត្តិសាស្ត្រអន្លង់វែងរបស់តាម៉ុក ដូចជា ផ្ទះ សារៈមន្ទីរ ស្ពាន បឹង មន្ទីរពេទ្យ សាលារៀន ឃ្លាំងដាក់សម្ភារៈជើងភ្នំ កន្លែងកែច្នៃគ្រាប់កាំភ្លើងលើភ្នំ២០០ ការដ្ឋានដឹកជញ្ជូន និងកន្លែងកាត់ទោស និងដុតសព ប៉ុលពត (តាម៉ុក) សុន សេន ខៀវ សំផន ជាដើម។ តំបន់វប្បធម៌ប្រវត្តិសាស្រ្តជាប្រាសាទបុរាណ មានដូចជា ប្រាសាទតាមាន់ តាក្របី ត្រពាំងប្រាសាទ ល្បើក ព្រហ្មកិល ជ័យក្បូរ ស្ពានទ័ព អូរស្វាយ ខ្នារ និងប្រាសាទរាជាសំរោង ព្រមទាំងតំបន់ធម្មជាតិបឹងស្នោ ទឹកធ្លាក់អូរស្វាយ អូរទឹកចោល ទំនប់ថ្មី ទំនប់ស្ទឹងស្រែង១ និងទំនប់ចុងកាល់ជាដើម។
ដោយឡែកវិស័យផ្សេងៗទៀត អាជ្ញាធរខេត្តក៏ដូចជាមន្ទីរជំនាញពាក់ព័ន្ធ បានខិតខំប្រឹងប្រែងអនុវត្តន៍ទៅតាមផែនការសកម្មភាព និងកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា ឱ្យទទួលបាននូវប្រសិទ្ធភាពខ្ពស់ ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ។
ក្រោយពីបានស្តាប់របាយការណ៍របស់អាជ្ញាធរខេត្តក៏ដូចជាមន្ទីរជំនាញពាក់ព័ន្ធរួចមក ឯកឧត្តម ប៉ា សុជាតិវង្ស បានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញភារកិច្ចយ៉ាងសកម្មរបស់ថ្នាក់ដឹកនាំខេត្ត និងមន្ទីរអង្គភាពពាក់ព័ន្ធទាំងអស់។ ឯកឧត្តមក៏បានស្នើសុំដល់អាជ្ញាធរឱ្យបន្តអនុវត្តវប្បធម៌សាមគ្គី សហការគ្នាបំពេញការងារក្នុងការបម្រើពលរដ្ឋ និងសង្គមជាតិបន្តទៀត។ ចំពោះសំណូមពរ និងបញ្ហាប្រឈមនានាដែលបានលើកឡើង ឯកឧត្តមប្រធានគណៈកម្មការទី៧ នៃរដ្ឋសភា នឹងពាំនាំជូនរាជរដ្ឋាភិបាលដោះស្រាយតាមរយៈ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
