នៅថ្ងៃទី១៤ ខែមីនានេះ នៅរាជបណ្ឌិត្យសភាកម្ពុជា បានរៀបចំសិក្ខាសាលាស្តីពីបច្ចេកវិទ្យា សមស្រប និងនវានុវត្តន៍ ក្រោមប្រធានបទ អនាគតប្រកបដោយចីរភាព ទឹក ជីវភាពរស់នៅ និង អាកាសធាតុ។ ក្នុងសិក្ខាសាលានេះថ្នាក់ដឹកនាំវិទ្យាស្ថានជីវសាស្ត្រនៃរាជបណ្ឌិត្យសភាកម្ពុជា បាន ចុះ ហត្ថលេខាព្រមព្រៀងគ្នាជាមួយ សកលវិទ្យាល័យជាតិសេអ៊ុល ប្រទេសកូរ៉េខាងត្បូង អនុវត្ត​គម្រោង​គ្រប់​គ្រងទឹកភ្លៀងតាមសាលារៀន។

បើតាមឯកឧត្តមបណ្ឌិត នុត សម្បត្តិ ប្រធានវិទ្យាស្ថានជីវសាស្ត្រ វេជ្ជសាស្ត្រ និងកសិកម្ម នៃ​រាជ​បណ្ឌិត្យ​សភាកម្ពុជា ថ្លែងថា ស្របពេលដែលពិភពលោក និងកម្ពុជា កំពុងជួប​បញ្ហា​ប្រឈម​ជា​សកល នៃការបម្រែបម្រួលអាកាសធាតុ គ្រោះរាំងស្ងួត ការបំពុល និង​ការ​កង្វះខាត​ទឹក​ប្រើប្រាស់​ជា​ដើម​នោះ នៅពេលនេះ រាជបណ្ឌិតសភាកម្ពុជា និងសកលវិទ្យាល័យជាតិសេអ៊ុល បាន​សម្រេច​ចុះ​ហត្ថ​លេខា​អនុវត្តគម្រោងសាលាទឹកភ្លៀងរួមគ្នា ដើម្បីពង្រឹងការងារគ្រប់គ្រប់ទឹកភ្លៀង នៅ​តាម​សាលា​រៀន​នានានៅកម្ពុជា ក៏ដូចបណ្តុះគំនិត ឲ្យពលរដ្ឋ និងកូនខ្មែរគ្រប់រូបចេះគ្រប់គ្រងទឹក សន្សំ​ទឹក និងមានទឹកគ្រប់គ្រាន់អាចប្រើប្រាស់បានទាំងនៅក្នុងសាលារៀន នៅតាមផ្ទះ និង​ទៅ​ស្រោច​ដំណាំ​ដាំដុះផ្សេងៗនៅគ្រប់រដូវ និងស្របពេលភាពរាំងស្ងួតឈានចូលមកដល់។

លោក សាស្ត្រាចារ្យ ម៉ូយុង ហាន តំណាងថ្នាក់ដឹកនាំមកពីសកលវិទ្យាល័យជាតិសេអ៊ុល ថ្លែងថា តាម​រយៈ​អនុវត្តគម្រោង សាលាទឹកភ្លៀងនេះ នឹងធ្វើឲ្យពលរដ្ឋខ្មែរ យល់ដឹង​អំពី​របៀប​នៃ​សន្សំ​ទឹក ការទទួលបានទឹកស្អាត ទឹកគ្មានជាតិពុលមកប្រើប្រាស់ ក៏ដូចការស្ទាក់ទឹកប្រើប្រាស់ធ្វើដំណាំ ជំរុញ​សហគមន៍មានភាពបៃតង អាចកាត់បន្ថយការគំរាមកំហែង និងការមានភាពធន ពីការ​ប្រែ​ប្រួល​​អាកាសធាតុជាដើម។

សូមបញ្ជាក់ថា ការចុះហត្ថលេខាលើកិច្ចព្រមព្រៀមអនុវត្តគម្រោងសាលាទឹកភ្លៀង រវាង​រាជ​បណ្ឌិត្យ​សភា​កម្ពុជា និងសកលវិទ្យាសេអ៊ុល គឺបានធ្វើឡើង បន្ទាប់ពីភាគីទាំងពីរបាន អនុវត្ត និ​ង​តំឡើង​ប្រព័ន្ធ​គ្រប់​គ្រងទឹកភ្លៀង នៅក្នុងសាលារៀនរដ្ឋចំនួន២កន្លែងទទួលបានជោគជ័យ ហើយ​តាម​រយៈ​ការ​ចុះ​ហត្ថលេខានាពេលនេះ ភាគីទាំងពីរ នឹងបន្តស្វែង​រក​សាលា​រៀន​នានា​ទៀត​ដែល​ងាយ​ជួប​ហានីភ័យខ្វះខាតទឹកប្រើប្រាស់ ដោយសារបញ្ហាគ្រោះរាំងស្ងួត គឺអាចទទួល​បាន​ទឹក​បាន​ប្រើប្រាស់​គ្រប់គ្រាន់៕ អត្ថបទ៖ ស៊ុម សុខជា