អ្នកនាំពាក្យក្រសួងការបរទេសរុស្ស៊ី លោកស្រី ម៉ារៀ ហ្សាខារ៉ូវ៉ា (Maria Zakharova) បាននិយាយកាលពីថ្ងៃពុធ (១៣ មីនា) ថាសហរដ្ឋអាមេរិក មានគម្រោងវាយប្រហារតាមអ៊ីនធឺណិតលើប្រព័ន្ធបោះឆ្នោតអេឡិចត្រូនិករបស់រុស្ស៊ី ក្នុងអំឡុងពេលបោះឆ្នោតប្រធានាធិបតីរបស់ខ្លួនចាប់ពីថ្ងៃទី១៥ ដល់ថ្ងៃទី១៧ ខែមីនា ខាងមុខនេះ។

លោកស្រី ហ្សាខារ៉ូវ៉ា ក៏បាននិយាយផងដែរថា ទីក្រុងវ៉ាស៊ីនតោន បានប្រគល់ភារកិច្ចឱ្យអង្គការមិនមែនរដ្ឋាភិបាលរបស់សហរដ្ឋអាមេរិក ក្នុងការធ្វើឱ្យប៉ះពាល់ដល់ការបោះឆ្នោត ដោយកាត់បន្ថយចំនួនអ្នកទៅបោះឆ្នោត។ ការអត្ថាធិប្បាយរបស់លោកស្រី បានជំរុញបន្ថែមលើការចោទប្រកាន់ស្រដៀងគ្នានេះដោយសេវាចារកម្មបរទេសរបស់រុស្ស៊ី ដែលបានធ្វើឡើងក្នុងសប្តាហ៍នេះ។

លោកប្រធានាធិបតី វ្ល៉ាឌីមៀ ពូទីន ដែលស្ទើរតែប្រាកដក្នុងការឈ្នះការបោះឆ្នោតប្រធានាធិបតីថ្ងៃទី១៥-១៧ ខែមីនា នេះ បានព្រមានលោកខាងលិចថា ការប៉ុនប៉ងណាមួយរបស់មហាអំណាចបរទេសដើម្បីជ្រៀតជ្រែកក្នុងការបោះឆ្នោត នឹងត្រូវបានចាត់ទុកថាជាទង្វើឈ្លានពាន។

លោកខាងលិច បានចាត់ទុកលោក ពូទីន ជាជនផ្តាច់ការ ឧក្រិដ្ឋជនសង្រ្គាម និងជាឃាតករ ដែលបានដឹកនាំរុស្ស៊ីចូលទៅក្នុងការដណ្តើមយកទឹកដីតាមបែបចក្រពត្តិ ដែលបានធ្វើឱ្យរុស្ស៊ីចុះខ្សោយ និងបំបាត់ភាពជារដ្ឋរបស់អ៊ុយក្រែន ខណៈពេលដែលព្យាយាមបង្រួមលោកខាងលិច និងប្រគល់បេសកកម្មក្រោយសង្រ្គាមត្រជាក់ដ៏លើសលប់ឱ្យអង្គការណាតូ៕