មន្ត្រីអាមេរិកមួយរូប បាននិយាយកាលពីថ្ងៃពុធថា សហរដ្ឋអាមេរិក មិនបានកែសម្រួលស្ថានភាពនុយក្លេអ៊ែររបស់ខ្លួន ដោយសារការគំរាមវាយប្រហារនុយក្លេអ៊ែរថ្មីរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីនទេ។

មន្ត្រីរូបនេះ ដែលបាននិយាយក្នុងលក្ខខណ្ឌមិនបញ្ចេញឈ្មោះ ក៏បានបញ្ជាក់ផងដែរថា ទីក្រុងវ៉ាស៊ីនតោនមិនបានឃើញសញ្ញាណាមួយដែលបង្ហាញថា រុស្ស៊ីកំពុងរៀបចំប្រើប្រាស់អាវុធនុយក្លេអ៊ែរ នៅក្នុងប្រទេសអ៊ុយក្រែន បន្ទាប់ពីការអត្ថាធិប្បាយរបស់លោកពូទីន។

មន្ត្រីរូបនេះ បានលើកឡើងថា លោក ពូទីន ហាក់ដូចជាកំពុងពិចារណាឡើងវិញនូវគោលនយោបាយនុយក្លេអ៊ែររបស់រុស្ស៊ីថា ពួកគេនឹងប្រើប្រាស់អាវុធនុយក្លេអ៊ែរ ប្រសិនបើអធិបតេយ្យភាពរបស់ពួកគេ ត្រូវបានគំរាមកំហែងនោះ។

លោកបានបន្ថែមថា៖«យើងមិនបានឃើញហេតុផលណាមួយ ដើម្បីកែសម្រួលស្ថានភាពនុយក្លេអ៊ែរផ្ទាល់ខ្លួនរបស់យើង ឬការបង្ហាញណាមួយដែលថា រុស្ស៊ីកំពុងរៀបចំប្រើប្រាស់អាវុធនុយក្លេអ៊ែរ នៅអ៊ុយក្រែនទេ»។

លោក Adrienne Watson អ្នកនាំពាក្យក្រុមប្រឹក្សាសន្តិសុខជាតិសេតវិមាន បាននិយាយនៅក្នុងសេចក្តីថ្លែងការណ៍មួយថា៖«វោហាស័ព្ទនុយក្លេអ៊ែររបស់រុស្ស៊ី គឺខ្វះការពិចារណា និងមិនទទួលខុសត្រូវចំពោះ ជម្លោះនេះទាំងស្រុង»។