កម្មវិធីដ៏ពេញនិយមរបស់បណ្ដាញទំនាក់ទំនងសង្គម TikTok កំពុងប្រឈមនឹងហានិភ័យមិនអាចដំណើរការបាននៅសហរដ្ឋអាមេរិក បន្ទាប់ពីសភាតំណាងរាស្ត្រ កាលពីថ្ងៃពុធ (ទី១៣ ខែមីនា) បានអនុម័តច្បាប់ដែលនឹងបង្ខំឲ្យក្រុមហ៊ុនមេ គឺក្រុមហ៊ុម ByteDance លក់កម្មវិធីបណ្ដាញសង្គមនេះក្នុងរង្វង់ ៦ខែ។

តែសេចក្តីស្នើច្បាប់នេះនៅតែត្រូវការអនុម័តពីព្រឹទ្ធសភា ហើយទាមទារឲ្យមានការចុះហត្ថលេខារបស់ប្រធានាធិបតីលោក Joe Biden ដើម្បីឲ្យកា្លយជាច្បាប់ជាធរមាន។ ទោះជាយ៉ាងណាក្ដី ការសម្រេចនេះបានធ្វើឲ្យអ្នកប្រើប្រាស់ អ្នកបង្កើតមាតិកា និងអ្នកនយោបាយជាច្រើនមិនសប្បាយចិត្តនោះឡើយ។ អ្នកបង្កើតមាតិកាម្នាក់ ឈ្មោះ Nathan Espinoza បានប្រាប់សារព័ត៌មាន AFP ថា៖ «វាមានលទ្ធភាពខ្ពស់ដែលវា (TikTok) អាចត្រូវបានហាមឃាត់ ដែលនេះជារឿងហួសហេតុណាស់។ សមាជិកសភាមិនយល់ថា តើវាជាបញ្ហាធំប៉ុនណានោះទេ។ មានមតិយោបល់អវិជ្ជមានជាច្រើន ចំពោះវីដេអូដែលខ្ញុំបានបង្ហោះអំពីប្រធានបទនេះដែលបញ្ជាក់ថា មនុស្សជាច្រើនមិនសប្បាយចិត្តនឹងការធ្វើបែបនេះ»។

អ្នកនយោបាយ និងអ្នកប្រើប្រាស់មួយចំនួនអះអាងថា សភាបានចាប់ផ្ដើមទទួលយកសេចក្ដីស្នើច្បាប់នេះ បន្ទាប់ពីមានការប៉ុនប៉ងជាច្រើន ដើម្បីហាមប្រាម TikTok ទាំងពីសំណាក់អតីតប្រធានាធិបតីលោក Donald Trump និងអ្នកនយោបាយផ្សេងទៀត ក្នុងប៉ុន្មានខែថ្មីៗនេះ ក្រោយមានការវាយប្រហាររបស់ពួកហាម៉ាសលើអ៊ីស្រាអែល កាលពីខែតុលាឆ្នាំមុន ដោយអ្នកគាំទ្រច្បាប់នេះអះអាងថា វេទិកានេះបានជំរុញដល់មាតិកាគាំទ្រប៉ាឡេស្ទីន។

បន្ទាប់ពីការចោទប្រកាន់គាំទ្រប៉ាឡេស្ទីន ក្រុមហ៊ុនរបស់បណ្ដាញសង្គមនេះ បានឲ្យដឹងនៅក្នុងសេចក្តីថ្លែងការណ៍មួយថា TikTok មិនបាន «ផ្សព្វផ្សាយ» បញ្ហាតែភាគីម្ខាង ដោយមិនគិតដល់ភាគីម្ខាងនោះទេ។ អ្នកមានឥទ្ធិពលលើបណ្ដាញសង្គម TikTok ជាច្រើន បាននាំគ្នាធ្វើដំណើរទៅកាន់ទីក្រុងវ៉ាស៊ីនតោន ដើម្បីចូលរួមក្នុងយុទ្ធនាការបញ្ចុះបញ្ចូលប្រឆាំងនឹងសេចក្ដីស្នើច្បាប់នេះ។ អ្នកនយោបាយជាច្រើននិយាយប្រឆាំងនឹងសេចក្ដីស្នើច្បាប់នេះ។ លើសពីនេះទៀត ការហាមប្រាមលើបណ្ដាញសង្គម TikTok នឹងក្លាយជាដំណឹងអាក្រក់ សម្រាប់អាជីវកម្មខ្នាតតូចដែលពឹងផ្អែកលើវេទិកានេះ សម្រាប់ទីផ្សារ ឬលក់ផលិតផល នៅលើ TikTok Shop ដែលជាការគាំទ្រផ្នែកពាណិជ្ជកម្មអេឡិចត្រូនិចរបស់ក្រុមហ៊ុន៕