មន្ត្រីម្នាក់ នៅថ្ងៃព្រហស្បតិ៍ (ទី១៤ ខែមីនា) បាននិយាយថា អ្នកទេសចរបរទេស ២នាក់ ក្នុងនោះរួមទាំងស្ត្រីជនជាតិអូស្ត្រាលីម្នាក់ផងដែរ បានស្លាប់នៅលើកោះបាលី ដែលជាកោះរមណីយដ្ឋានរបស់ប្រទេសឥណ្ឌូនេស៊ី បន្ទាប់ពីភ្លៀងធ្លាក់ខ្លាំង បានបង្កមានបំណាក់ដីដែលបានលេបត្របាក់ផ្ទះវីឡារបស់ពួកគេ។

គួរបញ្ជាក់ថា បណ្ដាតំបន់ធំៗនៃប្រជុំកោះឥណ្ឌូនេស៊ីដែលមានកោះចំនួន ១៧.០០០ ងាយនឹងមានទឹកជំនន់ និងបំណាក់ដី ក្នុងរដូវវស្សាដែលចាប់ផ្តើមនៅរង្វង់ខែវិច្ឆិកា។

មន្ត្រីទីភ្នាក់ងារជួយសម្រាលគ្រោះមហន្តរាយ ក្នុងតំបន់ លោក I Nyoman Srinadha Giri បានប្រាប់សារព័ត៌មាន AFP ថា កាលពីថ្ងៃព្រឹកពុធ (ទី១៣ ខែមីនា) ផ្ទះវីឡាធ្វើអំពីឈើនៅក្នុងភូមិ Jatiluwih នៅលើកោះទេសចរណ៍ដ៏ពេញនិយម គឺកោះបាលី ត្រូវបានវាយប្រហារដោយបំណាក់ដី បន្ទាប់ពីមានភ្លៀងធ្លាក់ខ្លាំង នៅតំបន់នោះ កាលពីយប់មុន។ មន្ត្រីដដែលបន្តថា ភ្លៀងធ្លាក់ខ្លាំងបានបណ្ដាលឲ្យបាក់ប្រឡាយទឹក ដែលនៅពីលើផ្ទះវីឡានោះ ហើយបានបង្កឲ្យមានជាពំណាក់ដី ដែលបានសម្លាប់អ្នកទាំង ២នាក់នោះ។

បំណាក់ដីនៅឥណ្ឌូនេស៊ី បានមានសភាពកាន់តែធ្ងន់ធ្ងរឡើងៗនៅកន្លែងខ្លះ ដោយសារការកាប់បំផ្លាញព្រៃឈើ ដោយភ្លៀងធ្លាក់ខ្លាំងអូសបន្លាយយូរបានបណ្តាលឲ្យមានទឹកជំនន់នៅតំបន់ខ្លះ។ បំណាក់ដី និងទឹកជំនន់ដែលបង្កឡើងដោយភ្លៀងធ្លាក់ខ្លាំង នៅលើកោះស៊ូម៉ាត្រា កាលពីសប្តាហ៍មុន បានសម្លាប់មនុស្សយ៉ាងហោចណាស់ ២៧នាក់៕