រុស្ស៊ី បាននិយាយ កាលពីថ្ងៃពុធថា ខ្លួនបានស្ទាក់ចាប់ និងបំផ្លាញយានដ្រូនអ៊ុយក្រែនមួយចំនួនក្នុងតំបន់វ៉ូរ៉ូនេស (Voronezh) បេលហ្គូរ៉ត (Belgorod) និងតំបន់ផ្សេងទៀត ខណ:ដែលភាគីអ៊ុយក្រែន ឲ្យដឹងនៅថ្ងៃជាមួយគ្នាថា ខ្លួនបានវាយប្រហារកន្លែងចម្រាញ់ប្រេង៣កន្លែង នៅក្នុងប្រទេសរុស្ស៊ីជាមួយនឹងយានដ្រូន។

អភិបាលតំបន់តំបន់កណ្ដាលរុស្ស៊ី លោកអាឡិចសិនឌើរ ហ្គូសេវ (Alexander Gusev) បាននិយាយកាលពីថ្ងៃពុធថា តាំងពីថ្ងៃអង្គារមក ប្រព័ន្ធការពារដែនអាកាស បានបាញ់ទម្លាក់យានដ្រូនជាង១០គ្រឿងពីលើតំបន់វ៉ូរ៉ូនេស។

ក្រសួងការពារជាតិរុស្ស៊ី បាននិយាយថា ប្រព័ន្ធការពារដែនអាកាស បានបាញ់ទម្លាក់យានដ្រូនអ៊ុយក្រែន១៦គ្រឿងពីលើតំបន់បេលហ្គូរ៉តព្រំដែនរុស្ស៊ីក្នុងរយ:ពេល២៤ម៉ោងកន្លងទៅនេះ។

អភិបាលតំបន់ លោកវីយ៉ាឆេស្លាវ ក្លាតកូវ (Vyacheslav Gladkov) បាននិយាយកាលពីថ្ងៃពុធថា កងទ័ពអ៊ុយក្រែន បានផ្លោងដាក់តំបន់បេលហ្គូរ៉ូតប្រមាណជា៣២០គ្រាប់ និងបានប្រើប្រាស់យានដ្រូន២៧គ្រឿងវាយប្រហាតំបន់នេះ ក្នុងរយ:ពេល២៤ម៉ោងកន្លងទៅនេះ។

អភិបាលតំបន់នេះ បានបញ្ជាក់ថា អគារអ្នកស្រុកជាង១២០ខ្នង ត្រូវបានបំផ្លាញ។

ក្រសួងការពារជាតិ បាននិយាយថា កងទ័ពរុស្ស៊ីក៍បានកម្ទេចប្រព័ន្ធការពារដែនអាកាសប៉ាទ្រីយ៉ូតផលិត នៅអាមេរិកបាន១គ្រឿងផងដែរនៅឯទីតាំងបាញ់១កន្លែងក្នុងតំបន់ខាកូវ (Kharkov) ក្នុងរយ:ពេល២៤ម៉ោងកន្លងទៅនេះ។

ដោយឡែក ប្រភពពត៌មាន យូក្រែនស្កា ប្រាវដា (Ukrainska Pravda)ឲ្យដឹងថា សេវាសន្ដិសុខអ៊ុយក្រែន បានវាយប្រហារកន្លែងចម្រាញ់ប្រេង៣កន្លែងក្នុងប្រទេសរុស្ស៊ីជាមួយនឹងយានដ្រូនជាច្រើនគ្រឿង កាលពីព្រឹកថ្ងៃពុធ ដែលមានឈ្មោះដូចជានៅក្រុងរីយ៉ាហ្សាន់ (Ryazan) និងក្រុងខេស្ដូវ៉ូ (Kstovo) ក្នុងខេត្ដ នីសនី ណូវហ្គូរ៉ូត(Nizhny Nogorod)និងក្រុងគីរីស៊ី(Kirishi)ក្នុងខេត្ដឡេនីនក្រាត។

ទីភ្នាក់ងារព័ត៌មានយូគ្រីហ្វម(Ukrinform) បានរាយការណ៍កាលពីថ្ងៃពុធថា នាយអគ្គសេនាធិការកងទ័ពអ៊ុយក្រែនលោក អូឡិកសាន់ឌើរ ស៊ើស្គី(Oleksandr Syrskyi) និងរដ្ឋមន្រ្ដីការពារជាតិ លោករុស្សស្ទេម អ៊ូមេរ៉ូវ (Rustem Uerov) បានអញ្ជើញចុះទៅត្រួតពិនិត្យប៉ុស្ដបញ្ជាការនានានៅជិតសមរភូមិមុខ ដើម្បីវិភាគពីសរភូមិ និងពង្រឹងកម្លាំងការពារឲ្យកាន់ប្រសើរថែមទៀត៕