ក្រសួងដឹកជញ្ជូនរបស់ប្រទេសកូរ៉េខាងត្បូង នៅថ្ងៃព្រហស្បតិ៍ (ទី១៤ ខែមីនា) នេះ បានឲ្យដឹងថា ក្រុមហ៊ុន Hyundai Motor Co និងក្រុមហ៊ុនរង Kia Corp នឹងប្រមូលមកវិញនូវរថយន្តអគ្គិសនី (EV) ប្រមាណជា ១៧០.០០០គ្រឿង នៅក្នុងប្រទេសកូរ៉េខាងត្បូង ដោយសារមានបញ្ហាសូហ្វវែរ នៅក្នុងប្រព័ន្ធសាកថ្ម។

ក្រសួងបានប្រាប់ថា ក្រុមហ៊ុន Hyundai នឹងប្រមូលរថយន្ត EV ចំនួន ១១៣.៩១៦គ្រឿង នៅក្នុងប្រទេស ដែលប៉ះពាល់ដល់រថយន្ត EV ចំនួន ៥ម៉ូដែល ក្នុងនោះរួមទាំងម៉ូដែលស៊េរី Ioniq និងស៊េរី Genesis ផងដែរ។ ចំណែកក្រុមហ៊ុន Kia នឹងប្រមូលរថយន្ត EV ចំនួន ៥៦.០១៦គ្រឿង។

ក្រសួងបានបន្ថែមថា កំហុសឆ្គងត្រូវបានរកឃើញលើសូហ្វវែរនៃផ្នែកត្រួតពិនិត្យការសាកថ្មដែលប្រើក្នុងរថយន្ត EV របស់ក្រុមហ៊ុន Hyundai និង Kia ដែលអាចធ្វើឲ្យពិបាកក្នុងការបញ្ចូលថាមពលថ្មវ៉ុលតាកម្រិតទាប និងនាំឲ្យរថយន្តអាចគាំងនៅពេលកំពុងបើកបរ។ ការប្រមូលមកវិញដោយស្ម័គ្រចិត្តនេះ គ្រោងនឹងចាប់ផ្តើមនៅថ្ងៃចន្ទ (ទី១៨ ខែមីនា) សប្ដាហ៍ក្រោយ៕