បណ្តាមូលដ្ឋានអាជីវកម្មទេសចរណ៍មានដូចជា ក្លឹបរំាង្គសាល បៀរហ្គាឌិន ផ្ទះសំណាក់ សណ្ឋាគារ​ជាដើម បានប្រកាសការពារអាជីវកម្មខ្លួន បុគ្គលិក និងគ្រប់អតិថិជនខ្លួន មិន​ពាក់ព័ន្ធ​គ្រឿងញៀន ហើយករណីមានពលរដ្ឋ និងអតិថិជនខ្លួនបានប្រើប្រាស់ ជួញដូរគ្រឿងញៀន គឺ​នឹង​រាយការណ៍​ទៅអាជ្ញាធរមានសមត្ថកិច្ច ដើម្បីជំរុញការបង្រ្កាបផង និងធ្វើឲ្យ​អាជីវកម្ម​ឲ្យ​រួចផុត​ពីការ​ទទួល​ទោស​នៅចំពោះមុខច្បាប់ផង។

ម្ចាស់អាជីវកម្ម និងតំណាងម្ចាស់អាជីវកម្មទេសចរណ៍នានា នៅរាជធានីភ្នំពេញ បានថ្លែង​ប្រាប់​BTV នៅថ្ងៃទី១៥ ខែមីនានេះថា នៅពេលនេះ ស្ទើរគ្រប់មូលដ្ឋានអាជីវកម្មទេសចរណ៍ គឺបាន​ទទួល​ការ​ផ្សព្វផ្សាយ និងណែនាំរួចហើយ អំពីវិធានការ​ប្រយុទ្ធ​ប្រឆាំង​គ្រឿង​ញៀន​នៅ​ក្នុង​រាជ​ធានីភ្នំពេញ ក៏ដូចនៅទូទាំងប្រទេសរួចហើយ តាមរយៈការផ្សព្វផ្សាយនេះ នៅមូលដ្ឋានអាជីវកម្ម នឹង​អនុវត្តវិធានការមួយចំនួន ដូចជា ការណែនាំ បិទស្លាកហាមប្រើប្រាស់គ្រឿងញៀន និង​ធ្វើ​ការ​ត្រួត​ពិនិត្យផង ណែនាំផ្ទាល់មាត់ផងជូនទៅដល់បណ្តាបុគ្គលិកខ្លួន និងអតិថិជន ចូល​ក្នុង​មូលដ្ឋាន​អាជីវកម្ម ដើម្បីការពារអាជីវកម្មរបស់ខ្លួន មិនឲ្យពាក់ព័ន្ធការប្រើប្រាស់ និង​ការ​ជួញ​ដូរ​គ្រឿង​ញៀន​។

ឯកឧត្តម ម៉ម វាសនា ក្នុងនាមប្រធានមន្ទីរទេសចរណ៍រាជធានីភ្នំពេញថ្លែងថា មក​ដល់​បច្ចុប្បន្ន​នេះ មន្ទីរបានចុះផ្សព្វផ្សាយច្បាប់ទេសចរណ៍ និងច្បាប់ ប្រឆាំងគ្រឿងញៀន ជូនដល់​បណ្តា​ម្ចាស់​មូល​ដ្ឋាន​អាជីវកម្មទេសចរណ៍បានចំនួនបីខ័ណ្ឌរួចហើយ ហើយមន្ទីរ នឹងចុះផ្សព្វ​ផ្សាយ​បន្ត​ឲ្យ​បាន​គ្រប់​ខ័ណ្ឌទាំងអស់ក្នុងរាជធានីភ្នំពេញ ដើម្បីឲ្យមូលដ្ឋានអាជីវកម្មទាំងអស់នោះ រួចផុត​ពី​ការ​ប្រឈម និងការទទួលទោស នៅចំពោះមុខច្បាប់។

ដើម្បីការពារអាជីវកម្ម​ទេសចរណ៍មិនឲ្យពាក់ព័ន្ធបញ្ហាគ្រឿងញៀន ឯកឧត្តម ម៉ម វាសនា បានស្នើ​គ្រប់មូលដ្ឋានអាជីវកម្មទាំងអស់ ត្រូវអនុវត្តវិធានការមួយចំនួន ដូចជា ៖ ទី១ ត្រូវ​បាន​បិទ​ស្លាក ស្ទិចឃ័រហាមប្រើប្រាស់ ជួញដូរគ្រឿងញៀន ក្នុងមូលដ្ឋានអាជីវកម្មខ្លួន ទី២ តាមKTV ខាអូខេ រាំង្គសាល ក្លឹប បៀរហ្គាឌិនជាដើម ត្រូវបានចាក់ផ្សាយសារ ឬចាក់ស្ពតវីដេអូ ហាម​ប្រើ​ប្រាស់ និងជួញដូរគ្រឿងញៀន ទី៣ ត្រូវរាយការណ៍បន្ទាន់ទៅអាជ្ញាធរមានសមត្ថកិច្ច ដើម្បីឲ្យ​មូល​ដ្ឋាន​អាជីវកម្មខ្លួនរួចផុតពីការពាក់ព័ន្ធគ្រឿងញៀន និងឲ្យ​សមត្ថកិច្ច​ចុះបង្រ្កាប​ឃាត់​ខ្លួន​ជន​ល្មើស​ទាន់​ពេលវេលា៕ អត្ថបទ៖ ស៊ុម សុខជា