​វាយកូនបាល់៖ ​ម្ចាស់​ជ័យលាភី Grand Slam ២០លើក Roger Federer បាន​ប្រកាស​ដក​ខ្លួន​មិន​ចូល​រួម​ការប្រកួត​អូឡាំពិក​រដូវក្តៅ​ទីក្រុង​តូ​ក្យូ​ឡើយ​ ដោយសារ​បញ្ហា​របួស​។ ​កីឡាករ​វ័យ ៣៩​ឆ្នាំ​រូប​នេះ​នៅ​មិនទាន់​ធូរស្បើយ ១០០% នៅឡើយ​ចំពោះ​របួស​ជង្គង់​របស់​ខ្លួន បន្ទាប់ពី​បរាជ័យ​នៅ​វគ្គ ៨​នាក់​ចុងក្រោយ​។​

​​កីឡាករ​វាយ​កូន​បាល់​កំពូល​របស់​ស្វ៊ី​សរូប​នេះ គឺជា​ម្ចាស់​មេដាយមាស​អូឡាំពិក​ទីក្រុង​ប៉េកាំង​ឆ្នាំ២០០៨ ក្នុង​វិញ្ញាសារ​វាយ​គូ និង​មេដាយប្រាក់​ឆ្នាំ២០១២ ទីក្រុង​ឡុង​ដ៍​វិញ្ញាសារ​ឯកត្តជន​ក្រោយ​ចាញ់ Andy Murray នៅ​វគ្គ​ផ្តាច់ព្រ័ត្រ​។ ​Roger Federer ដែល​បច្ចុប្បន្ន​ឈរ​លេខ ៩ ពិភពលោក​ធ្លាប់​បានទទួល​ការវះកាត់​ជង្គង់ ២លើក​កាលពី​ឆ្នាំ២០២០​។​ ​បន្ទាប់ពី​បរាជ័យ​ក្រោម​ស្នាដៃ​កីឡាករ​ប៉ូឡូញ Hubert Hurkacz នៅ​វគ្គ ៨នាក់​ចុងក្រោយ Wimbledon, Roger Federer បាន​និយាយថា​ គេ​មិនទាន់​ច្បាស់​ថា​ អាច​ប្រកួត​នៅ Wimbledon លើក​ក្រោយ​រឺក៏​អត់​។

​​ក្រៅពី Roger Federer កីឡាការិនី​អង់គ្លេស Johanna Konta ក៏បាន​ប្រកាស​ដកខ្លួន​ពី​អូឡាំ​ពិក​ទីក្រុង​តូ​ក្យូ​ដែរ ដោយសារ​បញ្ហា​សុខភាព​។ ​កីឡាការិនី​វ័យ ៣០ឆ្នាំ​រូបនេះ​ក៏​មិនបាន​ចូលរួម​ការប្រកួត Wimbledon នាពេល​កន្លងមក​ដែរ​ដោយសារ​ត្រូវធ្វើ​ច​ត្តា​ឡី​ស័ក ​បន្ទាប់ពី​ប៉ះពាល់​ផ្ទាល់​ជាមួយ​អ្នកជំងឺ Covid-19​។ ព្រឹត្តិការណ៍​អូឡាំពិក​ទីក្រុង​តូ​ក្យូ​នឹង​ចាប់ផ្តើម​នៅ​ថ្ងៃទី៨ ខែសីហា​ខាងមុខ​នេះហើយ​៕

​អត្ថបទ​៖​នាង សុភា​វុ​ធ