ប្រធានសម្ព័ន្ធសហជីពជាតិ រំពឹងទុកថា កម្ពុជា នឹងអាចទាក់ទាញបាននូវការវិនិយោគ ពី​វិនិយោគិន​បរទេសថ្មីៗជាច្រើនបន្ថែមទៀត ខណៈក្រសួងការងារ និងបណ្ដុះបណ្ដាលវិជ្ជាជីវៈ បាន​ដាក់​​ចេញនូវផែនការយុទ្ធសាស្ត្ររយៈពេល ៥ឆ្នាំរបស់ក្រសួង ដើម្បីលើកកម្ពស់សុវត្ថិភាព និង​សុខ​ភាព​ការងារ ការអភិវឌ្ឍលក្ខខណ្ឌការងារ និងសុខដុមនីយកម្ម នៃទំនាក់ទំនងវិជ្ជាជីវៈ។

លោក ហ្វា សាលី ប្រធានសម្ព័ន្ធសហជីពជាតិ នៅយប់ថ្ងៃទី១៤ ខែមីនា ឆ្នាំ២០២៤នេះ បាន​ឲ្យ​ទូរ​ទស្សន៍ព័​ត៌មាន ប៊ីធីវី ដឹងថា ជាការមើល​ឃើញក្នុ​ង​រយៈពេល៦ខែ មកនេះ​ក្រោម​ការ​ដឹកនាំ​រប​ស់​​រាជ​រដ្ឋាភិបាល អាណត្តិទី៧ គឺសម្រេចបានសមិទ្ធផលជាច្រើន ក្នុងនោះសម្រាប់​តែ​វិស័យ​ឧស្សាហកម្ម​កាត់​ដេរ ដូចជាការចចារប្រាក់ឈ្នួល , កម្មវិធីបណ្តុះបណ្តាលជំនាញបច្ចេកទេស និង​វិជ្ជាជីវៈ​ដល់​យុវជន ១,៥លាននាក់ និងរបបសន្តិសុខសង្គមជាដើម។ ជាពិសេស គម្រោង​វិនិយោគថ្មី​ៗ​ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា គឺឃើញថា មក​ដ​ល់ថ្ងៃនេះរោងចក្រមានការកើនឡើងខ្ពស់ជាទីកត់សម្គាល់ ហើយអ្វីដែលចាប់អារម្មណ៍បន្ថែម គឺមក​ដល់​ពេលនេះ​ក្រុមហ៊ុ​នមួយ​ចំនួន​ធំ​នោះ​ចាប់​ផ្តើម​មាន​ការ​អនុវត្ត​នូវ​លក្ខ​ខណ្ឌ​ការងារ​ល្អ​ប្រសើរ​ច្រើន​ជាង​មុន និងមានប្រសិទ្ធិភាព។ លោកបានបន្ថែមថា ទៅថ្ងៃអនាគតខាងមុខ អ្វីដែលសំខាន់ទៀតនោះ គឺមាន​ការ​ព្រួយ​បារម្ភ​ទៅ​វិញ​ទេ នៅពេលដែលកំណើននៃការវិនិយោគមកខ្លាំង យើងអាច​នឹង​ប្រឈ​ម​ខ្វះ​កម្លាំង​ពលកម្ម​ទៅ​វិញ​។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បាន​បញ្ជាក់ថា ផែនការយុទ្ធសាស្ត្រ មានដូចជា នៅក្នុងអាណត្តិនេះ ក្រសួងការងារ នឹង​បន្ត​យក​ចិត្តទុកដាក់លើការពង្រឹងការអនុវត្តច្បាប់ និងអភិវឌ្ឍន៍ក្របខណ្ឌគតិយុត្តិស្របតាមការប្រែប្រួល នៃ​លក្ខខណ្ឌការងារ និងការលេចឡើង នៃប្រភេទការងារថ្មីៗ ស្របតាមការវិវត្តន៍ នៃពិភពការងារ បន្ត​ពង្រឹងយន្តការអធិការកិច្ចការងារ តាមរយៈការចាត់វិធានការយ៉ាងម៉ឺងម៉ាត់ចំពោះសហគ្រាស គ្រឹះ​ស្ថាន ដែលអនុវត្តមិនបានត្រឹមត្រូវតាមច្បាប់ និងលិខិតបទដ្ឋានពាក់ព័ន្ធនឹងវិស័យការងារ ការ​លើក​កម្ពស់លក្ខខណ្ឌសុវត្ថិភាព និងសុខភាពការងារ ព្រមទាំងធានាថា លក្ខខណ្ឌ​ការងារ​នៅ​កម្ពុជា​ត្រូវ​បានអនុវត្តដោយអនុលោមតាមបទដ្ឋានការងារអន្តរជាតិ និងគោល​នយោបាយ​ពាណិជ្ជក​ម្ម​ផ្សារភ្ជាប់នឹងលក្ខខណ្ឌការងារ៕ អត្ថបទ៖ ឈិត បូរ៉ាវី