ប្រេស៊ីល៖ បាតុករ​រាប់​ពាន់​នាក់​បាន​ដើរ​ក្បួន​នៅ​ទីក្រុង Sao Paulo និង​ទីក្រុង Rio de Janeiro ដើម្បីទាមទារ​ឱ្យ​ប្រធានាធិបតី​លោក Jair Bolsonaro លាលែង​ពី​តំណែង​ពី​បទ​ចោទប្រកាន់​អំពើ​ពុករលួយ ហើយ​អ្វី​ដែល​ពួកគេ​និយាយ​គឺ​ការ​មិន​ដោះស្រាយត្រឹមត្រូវ ​ចំពោះ​វីរុស​រា​ត​ត្បា​ត COVID-19។​

ក្រុម​អ្នក​តវ៉ា​បាន​កាន់​ផ្ទាំង​បដាដែល​មាន​សរសេរ​ថា​ អំពើពុករលួយ និង​អំពើ​ប្រល័យ​ពូជសាសន៍​នៅ​ពេល​ពួកគេ​ប្រមូល​ផ្តុំគ្នា​នៅ​កណ្ដាល​ទីក្រុង Sao Paulo។​ នៅ​ទីក្រុង Rio ការ​ប៉ះទង្គិច​គ្នា​ទ្រង់​ទ្រាយ​តូច​ៗ​បាន​ផ្ទុះឡើង​រវាង​នគរបាល​ និង​បាតុករ​មួយ​ចំនួនបណ្ដាល​ឱ្យ​មាន​ការ​បាញ់​ឧស្ម័ន​បង្ហូរ​ទឹកភ្នែក ​ដើម្បី​បំបែកហ្វូង​មនុស្ស​។ លោក Bolsonaro កំពុង​រង​សម្ពាធ​កាន់​តែ​ខ្លាំង​ឡើង​ពី​ការស្ទង់មតិ និង​ការស៊ើបអង្កេត​របស់​ព្រឹទ្ធ​សភា​ ដែល​ចោទប្រកាន់​ពី​បទ​ពុករលួយ​ទាក់ទង​នឹង​ការទិញ​វ៉ាក់សាំង​។ មនុស្ស​ជាច្រើន​នៅ​ក្នុង​ការ​ប្រមូល​ផ្តុំគ្នា​និយាយ​ថា​ លោក​ប្រធានាធិបតី​ត្រូវ​ដាក់​កំហុស​ ចំពោះ​ការ​ស្លាប់​របស់​ប្រជាជន​ប្រេ​ស៊ី​ល​ជាង ៥៣​ម៉ឺន​នាក់ ចាប់​តាំង​ពី​ចុះបញ្ជី​វីរុស​រាតត្បាត​នៅ​ក្នុង​ប្រទេស​កាលពី​ឆ្នាំមុន​៕

អត្ថបទ៖ ប៊ុនថន