នៅពេលបច្ចុប្បន្នរដ្ឋបាលរាជធានីភ្នំពេញ សាងសង់បំពាក់​ឧបករណ៍​លំហាត់​ប្រាណ​សាធារណៈ​ជា​ច្រើន​ដាក់​តាមសួនសាធារណៈមួយចំនួនក្នុងរាជធានីភ្នំពេញ ហើយឧបករណ៍ហាត់ប្រាណនេះ មានតម្រូវការប្រើប្រាស់ធ្វើលំហាត់ប្រាណច្រើនពីសំណាក់ពលរដ្ឋចាស់ ក្មេង និងភ្ញៀវទេសចរជាតិ អន្តរជាតិ ដើម្បីថែទាំសុខភាពរបស់គេឲ្យបានល្អប្រសើរ និង​ជំនួស​ឲ្យ​ការ​ពិសារ​ឱសថ​ជំនួយ​សុខភាព​នានា។

ពលរដ្ឋ រាជធានីភ្នំពេញ ថ្លែងប្រាប់BTV នៅថ្ងៃទី១៥ ខែមីនានេះថា បច្ចុប្បន្ន ពលរដ្ឋ​ទាំង​អស់​គ្នា​មាន​ការ​ពេញចិត្ត មានតម្រូវការប្រើប្រាស់ឧបករណ៍ហាត់ប្រាណសាធារណៈនានានេះ ជា​ពិសេស​​សម្រាប់ពលរដ្ឋដែលបញ្ហាសុខភាព មិនអាចធ្វើលំហាត់បា្រណ ដោយការដើរ និង​រត់​ជា​ដើម​ ហើយពលរដ្ឋ​ក៏​បាន​ស្នើ​សុំ​អាជ្ញាធរ​ជួយ​សាង​សង់​ឧបករណ៍​ហាត់​ប្រាណ​សាធារណៈ​នេះឲ្យ​បា​ន​ច្រើន​កន្លែងទៀត ដើម្បីជំរុញលើកកម្ពស់សុខភាពពលរដ្ឋឲ្យបានល្អប្រសើរ និងកាត់​បន្ថយ​ថវិកា​ទៅ​ហាត់​នៅតាមក្លឹបហាត់ប្រាណឯកជន នៅពេលព្រឹកនិងល្ងាច។

លោក ម៉េត មាសភក្តី អ្នកនាំពាក្យរដ្ឋបាលរាជធានីពេញ បានថ្លែងថា បច្ចុប្បន្ន រដ្ឋបាល​រាជ​ធានី​ភ្នំពេញ កំពុងសិក្សាពិនិត្យលទ្ធភាពរកសួនច្បារសាធារណៈផ្សេងៗ ដែល​អាច​សាង​សង់​បំពាក់​ឧបករណ៍​លំហាត់ប្រាណសាធារណៈបន្ថែម ខណៈបច្ចុប្បន្នមន្ទីរសាធារណៈការ និងដឹកជញ្ជូន​រាជ​ធានី​ភ្នំពេញ​បានអនុវត្តផែនការសាងសង់ឧបករណ៍លំហាត់ប្រាណសាធារណៈនេះ បានប្រមាណ​ជិត​ ១០​កន្លែងរួចហើយ នៅតាមសួនតូចធំនានា។

លោក ថ្លែងទៀតថា ឧបករណ៍លំហាត់ប្រាណដែលដាក់តាមសួនសាធារណៈ គឺមិនដូច​ឧបករណ៍​ដាក់​បំពាក់នៅតាមក្លឹបប្រាណ និងតាមផ្ទះនោះទេ ដែលបញ្ហានេះ លោក ក៏បានស្នើ​សុំ​ពលរដ្ឋ​ជួយ​ថែ​ទាំ និងប្រើប្រាស់ឧបករណ៍ហាត់ប្រាណទៅតាមមុខងាររបស់វាត្រឹមត្រូវ និងស្នើ​រាយការណ៍​ទៅ​អាជ្ញាធរ​មូលដ្ឋានទៅធ្វើការជួសជុល ករណីមានឧបករណ៍លំហាត់ប្រាណ បាក់ សឹករិចរិល ខូច​ខាត​ជាដើម៕ អត្ថបទ ស៊ុម សុខជា