មន្ទីរពេទ្យមិត្តភាពខ្មែរ-សូវៀត សហការជាមួយអង្គការវីតាល់លីងអន្តរជាតិ នៃប្រទេសកូរ៉េ នា​ព្រឹក​ថ្ងៃទី១៥ ខែមីនា ឆ្នាំ២០២៤នេះ បានរៀបចំសិក្ខាសាលាស្តីពី ការផ្សាំសរីរាង្គ ក្រោមប្រធានបទ "ដំណើរ​ឆ្ពោះទៅរកការផ្តល់សេវាផ្សាំតម្រងនោម"។

លោកវេជ្ជបណ្ឌិត ចាន់ វិចិត្រ នាយករងមន្ទីរពេទ្យមិត្តភាពខ្មែរ-សូវៀត លើកឡើងថា រដ្ឋាភិបាល អាណត្តិ​ទី៧ បានយកចិត្តទុកដាក់យ៉ាងខ្លាំងលើការកែលម្អការថែទាំសុខភាព និងការលើក​កម្ពស់​ការ​រស់នៅ​ប្រកបដោយសុខភាពល្អក្នុងចំណោមប្រជាជន។ លោកបន្តថា ការប្តូរតម្រងនោម គឺជា​អាទិភាព​សំខាន់ នៃការថែទាំសុខភាព ដែលអាចធ្វើឲ្យប្រសើរ​ឡើង​នូវ​គុណភាព​ជីវិត​ សម្រាប់​អ្នក​ដែល​មាន​ជំងឺ​តម្រងនោមរ៉ាំរ៉ៃ។

លោកស្រីសាស្ត្រាចារ្យ Curie Ahn(គូរៀន អាន់) នាយកក្រុមហ៊ុន VitalLink International បាន​មានប្រសាសន៍ថា ថ្ងៃនេះលោកស្រីសាស្រ្តាចារ្យ រួមនិងគណៈប្រតិភូ បានចុះមកពិនិត្យ សិក្សា​ស្វែង​យល់ពីដំណើរការរបស់មនី្ទរពេទ្យ រួមនិងក្នុងប្រទេសកម្ពុជា ក្នុងបំណង​ធ្វើ​កិច្ច​សហ​ប្រតិបតិ្តការ ដើម្បីជួយដល់ក្រុមគ្រូពេទ្យកម្ពុជាទាំងការងារបណ្តុះបណ្តាល និង​ចែក​រំលែក​នូវ​បទ​ពិសោធន៍ ក្នុងការផ្សាំតម្រងនោម។

ឯកឧត្តមសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត ថ្លែងថា សិក្ខា​សាលា​នេះ​នឹង​ក្លាយ​ជា​សញ្ញានៃការអភិវឌ្ឍន៍ និងការច្នៃប្រឌិតថ្មីនៃផ្លូវថ្មីសម្រាប់អ្នកជំងឺតម្រងនោមរ៉ាំរ៉ៃ (CKD) នៅ​ក្នុងប្រទេសរបស់យើង។ ចំណុចសំខាន់នៃសិក្ខាសាលាគឺការប្រមូលផ្តុំវាគ្មិនជាតិ និង​អន្តរជាតិ​ដ៏​ល្អ​ឥតខ្ចោះលើប្រធានបទចំនួន 8 រួមទាំងវាគ្មិនមកពីប្រទេសកូរ៉េ និង​ការ​ចូលរួម​របស់​វេជ្ជ​បណ្ឌិត​ចំនួន១៥០នាក់ មក​ពីមន្ទីរពេទ្យជាតិកម្ពុជា។

ឯកឧត្តមនាយកមន្ទីរពេទ្យ សង្ឃឹមថាសិក្ខាសាលានេះនឹងផ្តល់នូវចំណេះដឹង និងគោលគំនិតថ្មីៗ ដែល​នឹងត្រូវបានចែករំលែកក្នុងចំណោមអ្នកចូលរួម ដើម្បីចាប់ផ្តើមគិតអំពីការព្យាបាលនេះ។ និយាយ​ដោយឡែកនៅឆ្នាំ ២០២៣ មានអ្នកជំងឺក្រៅចំនួន ៤៧៤,២០៥ នាក់ បានទៅ​ទទួល​សេវា​នៅ​មន្ទីរ​ពេទ្យមិត្តភាពខ្មែរ-សូវៀត។ ក្នុងឱកាសនោះ ឯកឧត្តមនាយក​មន្ទីរ​ពេទ្យ​បាន​ថ្លែង​អំណរ​គុណ​យ៉ាងជ្រាលជ្រៅចំពោះឯកឧត្តម សាស្ត្រាចារ្យ រដ្ឋមន្ត្រី និងថ្នាក់ដឹកនាំ​ក្រសួង​សុខាភិបាល ដែលតែងតែគាំទ្រមន្ទីរពេទ្យមិត្តភាពខ្មែរ-សូវៀត៕ អត្ថបទ រដ្ឋា