ក្រុមអ៊ីស្លាមប៉ាឡេស្ទីនហាម៉ាស បាននិយាយកាលពីថ្ងៃព្រហស្បតិ៍ (១៤ មីនា) ថាខ្លួនបានបង្ហាញដល់អ្នកសម្រុះសម្រួលនូវសំណើដ៏ទូលំទូលាយនៃកិច្ចព្រមព្រៀងបទឈប់បាញ់ដែលផ្អែកលើការបញ្ឈប់ «ការឈ្លានពាន» របស់អ៊ីស្រាអែលប្រឆាំងនឹងប៉ាឡេស្ទីននៅក្នុងតំបន់ហ្កាហ្សាស្ទ្រីប ការផ្តល់ការសង្គ្រោះ និងជំនួយ ការវិលត្រឡប់របស់ពលរដ្ឋភៀសខ្លួនហ្កាហ្សា ទៅផ្ទះសម្បែងរបស់ពួកគេវិញ និង ការដកទ័ពរបស់អ៊ីស្រាអែល។

ក្រុមហាម៉ាស បានបន្ថែមនៅក្នុងសេចក្តីថ្លែងការណ៍មួយថា សំណើនេះក៏រួមបញ្ចូលនូវជំហររបស់ក្រុមលើកិច្ចព្រមព្រៀងផ្លាស់ប្តូរអ្នកទោស និងចំណាប់ថ្នូរផងដែរ ប៉ុន្តែមិនបានបញ្ជាក់លម្អិតនោះទេ។

ការិយាល័យនាយករដ្ឋមន្ត្រីអ៊ីស្រាអែល លោក បេនចាមីន ណេតានយ៉ាហ៊ូ (Benjamin Netanyahu) បាននិយាយថា សំណើបទឈប់បាញ់ថ្មីនៅតំបន់ហ្កាហ្សា ដែលបង្ហាញដោយក្រុមហាម៉ាស ទៅកាន់អ្នកសម្រុះសម្រួលនេះ គឺនៅតែផ្អែកលើ «ការទាមទារដែលមិនប្រាកដប្រជា» ដដែល។

ក្រុមហាម៉ាស និយាយជាទៀងទាត់ថាខ្លួននឹងទទួលយកតែកិច្ចព្រមព្រៀងណាមួយ ដែលផ្អែកលើបទឈប់បាញ់អចិន្ត្រៃយ៍ដើម្បីបញ្ចប់សង្គ្រាម និងរួមបញ្ចូលការដកទ័ពអ៊ីស្រាអែលចេញពីតំបន់ហ្កាហ្សា ជាជាងបទឈប់បាញ់បណ្តោះអាសន្នផ្សេងទៀត៕