នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បាននិយាយថា កងទ័ពអ៊ីស្រាអែល នឹងចូលទៅក្នុងទីក្រុងរ៉ាហ្វា( Rafah) ភាគខាងត្បូងនៃតំបន់ហ្កាហ្សាស្ទ្រីប ទោះបីជាមានការព្រមានពីអន្តរជាតិក៏ដោយ។

លោកណេតាន់យ៉ាហ៊ូ បានប្រាប់ទាហានកាលពីថ្ងៃព្រហស្បតិ៍ថា៖«មានសម្ពាធអន្តរជាតិដែលរារាំងយើងមិនឲ្យចូលក្នុងទីក្រុងរ៉ាហ្វា និងបញ្ចប់ការងារនោះទេ»។

លោកបានបញ្ជាក់ថា លោកបានច្រានចោលសម្ពាធនេះ ហើយនឹងបន្តធ្វើដូច្នេះ។

លោកត្រូវបានគេដកស្រង់សម្ដី ដោយនិយាយថា៖ «យើងនឹងចូលទៅក្នុងទីក្រុងរ៉ាហ្វា។ «យើងនឹងបញ្ចប់ការលុបបំបាត់កងវរសេនាតូចរបស់ក្រុមហាម៉ាស។ យើងនឹងស្តារសន្តិសុខឡើងវិញ ហើយយើងនឹងនាំមកនូវជ័យជម្នះទាំងស្រុងសម្រាប់ប្រជាជនអ៊ីស្រាអែល និងរដ្ឋអ៊ីស្រាអែល»។

នៅទីក្រុងរ៉ាហ្វា ជាទីក្រុងមួយនៅជាប់ព្រំដែនជាមួយប្រទេសអេហ្ស៊ីប ប្រជាជនប៉ាឡេស្ទីនប្រមាណ ១,៥លាននាក់ កំពុងស្វែងរកការជ្រកកោនពីការប្រយុទ្ធ នៅក្នុងតំបន់ផ្សេងទៀតនៃតំបន់ហ្កាហ្សាស្ទ្រីប ក្នុងស្ថានភាពដ៏តឹងតែង។ ក្រុមអង្គការផ្តល់ជំនួយ កំពុងព្រមានអំពីការស្លាប់ និងរបួសជនស៊ីវិលជាច្រើនទៀត ប្រសិនបើអ៊ីស្រាអែល បើកប្រតិបត្តិការយោធាទ្រង់ទ្រាយធំ នៅទីនោះ។

បច្ចុប្បន្ន ប្រទេសជាច្រើន កំពុងរិះគន់សកម្មភាពរបស់យោធាអ៊ីស្រាអែល នៅតំបន់ហ្កាហ្សាស្ទ្រីប ដោយមើលឃើញពីស្ថានភាពមនុស្សធម៌ដ៏អាក្រក់។ ទោះជាយ៉ាងណាក៏ដោយ តាមទស្សនៈរបស់អ៊ីស្រាអែល ជ័យជម្នះលើក្រុមហាម៉ាស គឺមិនអាចធ្វើទៅរួចទេ បើគ្មានប្រតិបត្តិការនៅទីក្រុងរ៉ាហ្វាតេ ព្រោះខ្លួនភ័យខ្លាចការកើតឡើងវិញនៃអង្គការភេរវកម្ម បន្ទាប់ពីសង្គ្រាម។

សង្រ្គាមត្រូវបានបង្កឡើងដោយការសម្លាប់រង្គាលមួយពីក្រុមសកម្មប្រយុទ្ធក្រុមហាម៉ាស និងក្រុមជ្រុលនិយមផ្សេងទៀត បានសម្លាប់មនុស្សប្រហែល ១.២០០នាក់ និងចាប់ជំរិតមនុស្ស ២៥០នាក់ផ្សេងទៀត នៅក្នុងប្រទេសអ៊ីស្រាអែល កាលពីថ្ងៃទី៧ ខែតុលា។