ទូរទស្សន៍រដ្ឋ RTS បានរាយការណ៍តាមរយៈគេហទំព័ររបស់ខ្លួនថា មេគណបក្សប្រឆាំងសេណេហ្គាល់ លោក Ousmane Sonko និងបេក្ខជនប្រធានាធិបតីដែលលោកកំពុងគាំទ្រ សម្រាប់ការបោះឆ្នោតថ្ងៃទី២៤ ខែមីនា គឺលោក Bassirou Diomaye Faye ត្រូវបានដោះលែងពីពន្ធនាគារហើយ កាលពីថ្ងៃព្រហស្បតិ៍ (ទី១៤ ខែមីនា)។

ការដោះលែងចំពោះមេដឹកនាំទាំងនេះត្រូវបានរំពឹងទុករួចហើយ បន្ទាប់ពីសភាបានអនុម័តច្បាប់លើកលែងទោស កាលពីថ្ងៃទី៦ ខែមីនា ខណៈដែលអាជ្ញាធរបានស្វែងរកការបន្ធូរបន្ថយភាពតានតឹង បន្ទាប់ពីមានកិច្ចប្រឹងប្រែងដែលត្រូវបានរារាំងរបស់ពួកគេ ក្នុងការពន្យារពេលការបោះឆ្នោតរយៈពេល ១០ខែ។ យ៉ាងណាក្ដី ប្រព័ន្ធផ្សព្វផ្សាយ RTS មិនបានផ្តល់ព័ត៌មានលម្អិតបន្ថែមនោះទេ ហើយភ្លាមៗ វាក៏មិនច្បាស់ដែរថា តើអ្នកទាំង២ កំពុងនៅទីណា បន្ទាប់ពីការដោះលែងនោះ។

បន្ទាប់ពីមាននូវព័ត៌មាននេះ អ្នកគាំទ្ររាប់ពាន់នាក់បានប្រមូលផ្តុំគ្នានៅរដ្ឋធានី Dakar ដើម្បីអបអរសាទរ ដោយស្រែកហៅឈ្មោះលោក Sonko នៅលើផ្លូវដ៏កកស្ទះ ជាកន្លែងដែលលោករស់នៅ។ អ្នកគាំទ្រទាំងនោះ មានខ្លះដុតកាំជ្រួច ខ្លះរាំច្រៀង ឬចុចស៊ីផ្លេម៉ូតូ និងរថយន្តរបស់ពួកគេ។

លោក Sonko បានអំពាវនាវដល់អ្នកគាំទ្ររបស់លោកឲ្យគាំទ្រលោក Faye សម្រាប់ការប្រជែងតំណែងប្រធានាធិបតី ដែលបង្កជាក្តីបារម្ភចំពោះគូប្រជែង ខណៈដែលលោក Sonko ទទួលបានការគាំទ្រយ៉ាងទូលំទូលាយ ជាពិសេសក្នុងចំណោមយុវជនដែលខកចិត្តនឹងការលំបាកផ្នែកសេដ្ឋកិច្ច និងការខ្វះការងារធ្វើ នៅក្នុងប្រទេសអាហ្វ្រិកខាងលិច ដែលមានប្រជាជនចំនួន ១៧លាននាក់នេះ។

គួរបញ្ជាក់ថា សមាជិកនៃគណបក្ស Pastef ដែលត្រូវបានរំលាយរបស់លោក Sonko និងគណបក្សផ្សេងទៀត បានបង្កើតជាក្រុមចម្រុះមួយ ហើយបានជ្រើសរើសលោក Faye ជាបេក្ខជនប្រធានាធិបតី នៅក្នុងខែវិច្ឆិកា។ ចំណែកលោក Sonko ត្រូវបានដកសិទ្ធិដោយសារជាប់ទោសពីបទបរិហារកេរ្តិ៍ដែលលោកបាននិយាយថា មានហេតុផលនយោបាយ ជាការលើកឡើងដែលត្រូវបានអាជ្ញាធរបដិសេធ៕