ព្រឹទ្ធសភាអាហ្សង់ទីន កាលពីថ្ងៃព្រហស្បតិ៍ (ទី១៤ ខែមីនា) បានបោះឆ្នោតបដិសេធ «ក្រឹត្យកំណែទម្រង់សេដ្ឋកិច្ចចម្រុះ» របស់ប្រធានាធិបតីលោក Javier Milei ដែលការសម្រេចនេះប៉ះពាល់យ៉ាងធ្ងន់ធ្ងរដល់របៀបវារៈឆ្លើយតបសេដ្ឋកិច្ចរបស់មេដឹកនាំសេរីនិយមរូបនេះ ខណៈដែលលោកព្យាយាមដោះស្រាយសេដ្ឋកិច្ចរបស់ប្រទេសដែលកំពុងមានវិបត្តិ។

លោក Milei ដែលគណបក្សរបស់លោកមានសំឡេងភាគតិចនៅក្នុងសភា បានចូលកាន់តំណែង កាលពីខែធ្នូ ហើយបានប្រើអំណាចក្រឹត្យប្រធានាធិបតីរបស់លោក ដើម្បីដាក់ចេញវិធានការជាច្រើន រាប់ចាប់ពីការធ្វើឯកជនភាវូបនីយកម្ម រហូតដល់កំណែទម្រង់ការងារ។

យ៉ាងណាក្ដី ក្រឹត្យដែលដើមឡើយមានជាង ៦០០មាត្រា ត្រូវបានច្រានចោលនៅក្នុងការបោះឆ្នោតជាមួយនឹងសំឡេង ៤២ទល់នឹង២៥ ដោយមានសំឡេងអនុបវាទ ៤សំឡេង ហើយច្បាស់ណាស់អាចត្រូវបានលុបចោលទាំងស្រុង ប្រសិនបើត្រូវបានបដិសេធដោយសភាជាន់ទាបរបស់ប្រទេសអាហ្សង់ទីនផងដែរនោះ។ ហើយអ្វីដែលសំខាន់នោះ គឺថា គណបក្សរបស់លោកប្រធានាធិបតី មានសំឡេងភាគតិច នៅក្នុងសភាទាំង២៕