សាក្សី និងប្រជាពលរដ្ឋ និយាយថា ក្រុមវាយប្រហារនៅរដ្ឋធានីប្រទេសសូម៉ាលី បានវាយឆ្មក់សណ្ឋាគារមួយកន្លែងនៅជិតការិយាល័យប្រធានាធិបតី ក្រោយការបំផ្ទុះគ្រាប់ ២លើក ក្នុងនោះក្រុមឧទ្ទាម Al Shabaab បានប្រកាសទទួលស្គាល់ចំពោះការវាយប្រហារលើកនេះ ។

 ការផ្ទុះកាំភ្លើង បានកើតមានឡើងបន្ទាប់ពីការផ្ទុះគ្រាប់កាលពីល្ងាចថ្ងៃព្រហស្បតិ៍ ហើយក្រុមប្រដាប់អាវុធគ្មានអត្តសញ្ញាណ បានវាយប្រហារសណ្ឋាគារ Syl ដែលជាកន្លែងជួបជុំដ៏ពេញនិយមសម្រាប់ក្រុមមន្រ្តីរដ្ឋាភិបាល និងក្រុមតំណាងរាស្រ្ត ។ ក្រុមនគរបាល និងអ្នកនាំពាក្យរដ្ឋាភិបាលសូម៉ាលី ពុំអាចទាក់ទងសុំសេចក្តីអត្ថាធិប្បាយភ្លាមៗបាននោះទេ ។

 ក្រុមឧទ្ទាម Al Shabaab បាននិយាយថា ពួកគេនៅពីក្រោយការវាយប្រហារនេះ ការឡោមព័ទ្ធសណ្ឋាគារ Syl ។

 ពួកគេបាននិយាយនៅក្នុងសេចក្តីថ្លែងការណ៍ថា ក្រុមប្រដាប់អាវុធ Mujahideen បានគ្រប់គ្រងសណ្ឋាគារ និងបានបាញ់ប្រហារក្រុមកម្មករ និងក្រុមមន្រ្តីរបស់រដ្ឋាភិបាលគ្មានសាសនាសូម៉ាលី ។

 គួរឲ្យដឹងថា កាលពីឆ្នាំ ២០១៩ ក្រុមឧទ្ទាម Al Shabaab បានប្រកាសទទួលស្គាល់ផងដែរចំពោះការវាយប្រហារលើសណ្ឋាគារតែមួយនេះ ៕