ក្រុមអ្នកវិទ្យាសាស្រ្តនៅតំបន់អង់តាក់ទិក បានព្រមានពីការរីករាលដាលឆ្លងជំងឺគ្រុនផ្តាសាយបក្សី H5N1 ក្រោយជំងឺ ត្រូវបានរកឃើញជាលើកដំបូងនៅលើទ្វីបមួយនេះ កាលពីខែមុន ហើយចាប់តាំងពីពេលនោះមក គេបានរកឃើញករណីឆ្លងលើសត្វផេនគ្វីន និងសត្វក្អែកទឹក ។

ការរីករាលដាលឆ្លងវីរុសនៅទ្វីបអង់តាក់ទិក ដែលបានធ្វើឲ្យចំនួនសត្វស្លាបថមថយនៅទូទាំងពិភពលោក និងធ្វើឲ្យប៉ះពាល់ដល់សត្វស្លាបព្រៃនៅអាមេរិកខាងត្បូង ក៏ដូចជាចំនួនថនិកសត្វសមុទ្រនោះ បានប្រកាសអាសន្នពីផលប៉ះពាល់ដល់អាណាចក្រសត្វផេនគ្វីនដ៏ធំនៅទ្វីបកកមួយនេះ ។

លោក Fabiola Leon គឺជាអ្នកស្រាវជ្រាវមកពីសាកលវិទ្យាល័យកាតូលិក Pontifical របស់ឈីលី ដែលរួមចំណែកក្នុងបេសកកម្មស្រាវជ្រាវកាលពីចុងឆ្នាំ ២០២៣ និងដើមឆ្នាំ ២០២៤ ដើម្បីតាមដានវីរុសផ្តាសាយបក្សីនៅទ្វីបអង់តាក់ទិក និយាយថា មាននូវពពួកសត្វដែលស្ថិតក្នុងគ្រោះថ្នាក់នៃការផុតពូជ ដូចជាសត្វផេនគ្វីន និងសត្វស្លាបដទៃជាច្រើនទៀត ។

លោក Leon ថា ករណីវិជ្ជមានកើតមានលើសត្វផេនគ្វីន ៩ក្បាល និងសត្វក្អែកទឹកអង់តាក់ទិក ១ក្បាល ។

វិទ្យាស្ថានអង់តាក់ទិកឈីលី(INACH)ដែលរៀបចំបេសកកម្មស្រាវជ្រាវខាងលើ បានប្រកាសក្នុងសប្តាហ៍នេះថា ពួកគេបានរកឃើញករណីវិជ្ជមានថ្មីនៃជំងឺគ្រុនផ្តាសាយបក្សីនៅក្នុងតំបន់ ដែលជាការរកឃើញដ៏សំខាន់ រួមទាំងករណីឆ្លងវីរុសលើសត្វផេនគ្វីនផងដែរ ៕