ស្របពេលការអធិស្ឋានពេលល្ងាចចាប់ផ្តើមនៅទូទាំងតំបន់ហ្កាហ្សាស្រ្ទីប គ្រួសារលោក Abu Rizek បានទទួលទានអាហារនៅក្រោមគំនរបាក់បែក ។ ខែពិសិដ្ឋមូស្លីមរ៉ាម៉ាដាន ខុសប្លែកខ្លាំងសម្រាប់ពួកគេនៅក្នុងឆ្នាំនេះ ។

តាមធម្មតា ក្រុមគ្រួសារជួបជុំគ្នាជាមួយមិត្តភ័ក្តិ និងអ្នកជិតខាង ដើម្បីទទួលទានអាហារ បួងសួង និងប្រារព្ធពិធីតមអាហាររួមគ្នា ។

ប៉ុន្តែឥឡូវគ្រួសារលោក Abu Rizek អង្គុយនៅក្រោមគំនរបាក់បែកផ្ទះរបស់ពួកគេ ទទួលទានអាហាររបស់ពួកគេ ពេលដែលថ្ងៃលិច ក្រោយពុំបានទទួលទានអ្វីបន្តិចសោះរយៈពេល ១២ម៉ោង ។

លោក Abu Rizek បានរំឭកដល់រឿងដែលគ្រួសារលោកបាត់បង់អ្វីគ្រប់បែបយ៉ាងនៅក្នុងយុទ្ធនាការសឹករបស់អ៊ីស្រាអែល ។

លោកនិយាយថា ពិធីបុណ្យរ៉ាម៉ាដានឆ្នាំមុន ពិតជាអស្ចារ្យខ្លាំងណាស់ ប៉ុន្តែឆ្នាំនេះមិនមែននោះទេ ។ អ្វីច្រើនណាស់លែងមានទៀតហើយ បងស្រីរបស់ខ្ញុំ គ្រួសាររបស់ខ្ញុំ ផ្ទះរបស់ពួកយើង ត្រូវបានបំផ្លិចបំផ្លាញគ្មានសល់ នៅមានមនុស្សស្ថិតក្រោមគំនរបាក់បែក ហើយពួកគេពុំទាន់ត្រូវបានទាញចេញនៅឡើយទេ ។

លោកបន្តថា ផ្ទះមួយខ្នងនេះ គឺជាក្តីស្រមៃរបស់កូនៗ របស់របរក្មេងលេងរបស់ពួកគេ និងអ្វីៗគ្រប់បែបយ៉ាង បានបាត់បង់អស់រលីង ។

ខណៈពេលនោះដែរ ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ចំនួនអ្នកស្លាប់របស់ជនប៉ាឡេស្ទីននៅតំបន់ហ្កាហ្សាស្ទ្រីប ពីការវាយប្រហារដែលកំពុងបន្តរបស់អ៊ីស្រាអែល បានកើនឡើងដល់ជាង ៣១.៣០០ នាក់ ។ 

ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនប៉ាឡេស្ទីនចំនួន ៦៩ នាក់ និងមនុស្ស ១១០នាក់ផ្សេងទៀត បានរងរបួសនៅក្នុងតំបន់ឆ្នេរហ៊ុមព័ទ្ធនេះ ដែលនាំឱ្យចំនួនអ្នកស្លាប់សរុបកើនឡើងដល់ ៣១.៣៤១ នាក់ និងអ្នករបួសកើនឡើងដល់ទៅ ៧៣.១៣៤ នាក់ ចាប់តាំងពីការផ្ទុះឡើងនៃជម្លោះអ៊ីស្រាអែលនិងក្រុមហាម៉ាសនៅថ្ងៃទី០៧ ខែតុលា ឆ្នាំ២០២៣ មក ៕