ប្រធានាធិបតីអេហ្ស៊ីបលោក Abdel Fattah al-Sisi និយាយនៅថ្ងៃសុក្រនេះថា អេហ្ស៊ីប កំពុងព្យាយាមឈានដល់បទឈប់បាញ់នៅតំបន់ហ្កាហ្សា បង្កើនច្រកដឹកជំនួយ ដើម្បីឲ្យពលរដ្ឋជម្លៀសខ្លួននៅតំបន់ភាគខាងត្បូងនៃដែនដីបិទច្រកមួយនេះ ផ្លាស់ទីមកកាន់តំបន់ភាគខាងជើងវិញ ។

លោក Sisi បានព្រមានពីគ្រោះថ្នាក់នៃការវាយលុករបស់អ៊ីស្រាអែលចូលទៅក្នុងទីក្រុង Rafah ជាទីដែលមនុស្សប្រហែល ១,៥លាននាក់ ស្វែងរកទីជម្រកនៅជាប់ព្រំដែនហ្កាហ្សាជាមួយអេហ្ស៊ីប ។

ក្រុមមន្រ្តីជំនួយ បានព្រមានពីការជិតកើតមានគ្រោះទុរ្ភិក្សនៅតំបន់បិទច្រកមួយនេះ ។

អំឡុងដំណើរទស្សនកិច្ចទៅកាន់បណ្ឌិតសភានគរបាលអេហ្ស៊ីប លោក Sisi និយាយថា ពួកយើងបានខិតខំអស់ពីសមត្ថភាពបំផុតរបស់ពួកយើង ដើម្បីឈានដល់បទឈប់បាញ់នៅតំបន់ហ្កាហ្សាស្រ្ទីប ។

អេហ្ស៊ីបដែលព្រួយបារម្ភពីការជម្លៀសខ្លួនជនប៉ាឡេស្ទីនចូលទៅជិតតំបន់ព្រំដែនរបស់ខ្លួននោះ បានព្យាយាម ជាមួយកាតា និងសហរដ្ឋអាមេរិក សម្របសម្រួលរវាងអ៊ីស្រាអែល និងក្រុមហាម៉ាស់ ដើម្បីឈានដល់កិច្ចព្រមព្រៀងសម្រាប់បទឈប់បាញ់ និងការដោះលែងចំណាប់ថ្នូរអ៊ីស្រាអែល ជាការដោះដូរនឹងអ្នកទោសប៉ាឡេស្ទីន ៕