កំពង់ឆ្នាំង៖ ឯកឧត្តមបណ្ឌិត អ៊ុក រ៉ាប៊ុន ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកំពង់ឆ្នាំង បានមានប្រសាសន៍ថា ការងារអប់រំ គឺជាគោលនយោបាយអាទិភាពរបស់រាជរដ្ឋាភិបាល ហើយត្រូវបានយកចិត្តទុកដាក់កសាងមូលដ្ឋានសិក្សានៅគ្រប់ភូមិសិក្សានៅទូទាំងប្រទេស។ ឯកឧត្តមបានថ្លែងបែបនេះ ក្នុងពេលឯកឧត្តមចុះជួបមាតាបិតាសិស្ស លោកគ្រូអ្នកគ្រូ សិស្សានុសិស្ស នៅសាលាបឋមសិក្សាឡពាង ស្ថិតក្នុងភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង នាល្ងាចថ្ងៃទី១៥ ខែមីនា ឆ្នាំ២០២៤នេះ។

ឯកឧត្តមបណ្ឌិតបានថ្លែងអំណរគុណចំពោះលោកគ្រូអ្នកគ្រូ នៅទូទាំងខេត្តកំពង់ឆ្នាំង ជាពិសេសនៅក្នុងសាលាបឋមសិក្សាឡពាងនេះ ដែលកន្លងមកបានរួមចំណែកយ៉ាងធំធេងក្នុងការកសាងធនធានមនុស្ស តាមរយៈការបង្ហាត់បង្រៀនសិស្សដោយមិនគិតពីកម្លាំងកាយចិត្ត បើទោះជាមូលដ្ឋានសិក្សាខ្លះមិនទាន់សមស្របទៅតាមនិយាមគរុកោសល្យ និងឧបទ្ទេសសិក្សាក៏ដោយ ។ ចំណែកសិស្សានុសិស្សនៅតែបានឆ្លងផុតទៅបន្តសិក្សានៅតាមអនុវិទ្យាល័យ វិទ្យាល័យ រហូតឧត្តមសិក្សាជាបន្តបន្ទាប់ផងដែរ។ ជាក់ស្ដែងថ្ងៃនេះនៅក្នុងសាលាបឋមសិក្សាឡពាង ត្រូវបានក្រុមការងាររាជរដ្ឋាភិបាលរួមជាមួយនឹងមាតាបិតាសិស្ស លោកគ្រូអ្នកគ្រូ ចូលរួមពិគ្រោះគ្នាអំពីតំរូវការរបស់ក្មួយៗនៅក្នុងសាលា ដើម្បីធ្វើយ៉ាងណាអោយក្មួយៗក្លាយខ្លួនជាទំពាំងស្នងឬស្សីដ៏រឹងមាំនៃប្រទេសជាតិ រួមនិងមានការងារធ្វើល្អទៅអនាគតផងដែរ។ ឯកឧត្តមបណ្ឌិត អ៊ុក រ៉ាប៊ុន បានអំពាវនាវដល់ប្រជាពលរដ្ឋ ត្រូវថែរក្សាសុខសន្តិភាព ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី ដែលបាននាំមកនូវការអភិវឌ្ឍរីកចម្រើនលើគ្រប់វិស័យ បន្ថែមលើសពីនេះត្រូវរួមគ្នាថែរក្សាសមិទ្ធផលដែលកើតមាននៅក្នុងមូលដ្ឋាននេះឲ្យបានគង់វង្សសម្រាប់ឲ្យកូនចៅបន្តសិក្សាពីមួយជំនាន់ទៅមួយជំនាន់មួយទៀត។

តំណាងមាតាបិតា អាណាព្យាបាលសិស្ស បានសម្តែងការអបអរសាទរសប្បាយរីករាយជាខ្លាំង ចំពោះឯកឧត្តមបណ្ឌិត អ៊ុក រ៉ាប៊ុន និងក្រុមការងារគណបក្សចុះខេត្ត ដែលបានជួបសួរសុខទុក្ខសិស្សានុសិស្ស មាតាបីតា លោកគ្រូអ្នកគ្រូ និងបានជួយឧបត្ថមទាំងសម្ភារៈសិក្សា និងថវិកាមួយចំនួនដល់លោកគ្រូអ្នកគ្រូ និងសាលា ជាពិសេសបានជួយផ្តល់នូវរូបសំណាកព្រះសង្ឃរាជ ជួន ណាត ដល់សាលាទុកសម្រាប់កូនចៅជំណាន់ក្រោយបានស្គាល់ផងដែរ ៕ ដោយ ៖ កាំង ហុងវាស្នា