​

សមាជិកក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ បានថ្កោលទោសកិច្ចខិតខំប្រឹងប្រែងរបស់រុស្ស៊ី ក្នុងការបោះឆ្នោតប្រធានាធិបតីរបស់ខ្លួននៅក្នុងតំបន់របស់ប្រទេសអ៊ុយក្រែនដែលត្រូវបានចូលគ្រប់គ្រង។ លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ បាននិយាយថា យុទ្ធសាស្ត្ររបស់រុស្ស៊ីក្នុងការរៀបចំការបោះឆ្នោតក្លែងបន្លំនៅក្នុងទឹកដីរបស់អ៊ុយក្រែនដែលបានចូលមកគ្រប់គ្រង តាមពិត គឺជាគំរូមួយ វាគឺជាការអនុវត្តន៍ឃោសនាបំផ្លើស។លោក James Kariuki ឯកអគ្គរដ្ឋទូតរងរបស់ចក្រភពអង់គ្លេសប្រចាំនៅអង្គការសហប្រជាជាតិ បាននិយាយថា ការបោះឆ្នោតទាំងនេះគឺជាការបន្លំ ដោយសារតែការពិតដ៏សាមញ្ញ គឺអ្នកមិនអាចរៀបចំការបោះឆ្នោតស្របច្បាប់នៅក្នុងប្រទេសរបស់នណាម្នាក់បានឡើយ។ លោក ស៊ឺហ្គី គីសលីតស្យា(Sergiy Kyslytsya) ឯកអគ្គរដ្ឋទូតអ៊ុយក្រែនប្រចាំនៅអង្គការសហប្រជាជាតិ បាននិយាយថា ដំណើរការបោះឆ្នោតក្លែងបន្លំនៅក្នុងទឹកដីដែលបានចូលគ្រប់គ្រងបណ្តោះអាសន្ន ត្រូវបានសម្គាល់ដោយមានការបំភិតបំភ័យ និងការបង្ខិតបង្ខំប្រជាជននៅក្នុងតំបន់។ ក្នុងចំណោមនោះ មានការគំរាមកំហែងដល់អាយុជីវិត ការឃុំខ្លួនដោយខុសច្បាប់ ការបដិសេធមិនឲ្យទទួលបានសេវាថែទាំសុខភាព និងសេវាសង្គម ការគំរាមកំហែងនៃការនិរទេស និងការរឹបអូសទ្រព្យសម្បត្តិ។ ប្រទេសជាសមាជិកអង្គការសហប្រជាជាតិជាង ៥០ប្រទេស បានថ្កោលទោសកិច្ចខិតខំប្រឹងប្រែងរបស់រុស្ស៊ីក្នុងការបោះឆ្នោតប្រធានាធិបតីរបស់ខ្លួននៅក្នុងតំបន់របស់អ៊ុយក្រែន ដែលត្រូវបានចូលមកគ្រប់គ្រង។ លោក វ្ល៉ាឌីមៀ ពូទីន បានចោទប្រកាន់អ៊ុយក្រែន ពីការព្យាយាមរំខានដល់ការបោះឆ្នោតប្រធានាធិបតី រុស្ស៊ី ដែលអាចនឹងប្រាកដថាផ្តល់ឱ្យលោករយៈពេល ៦ ឆ្នាំបន្ថែមទៀត នៅក្នុងវិមានក្រឹមឡាំង និងបាននិយាយថា ទីក្រុងមូស្គូនឹងដាក់ទណ្ឌកម្មលើទីក្រុងគីវ សម្រាប់ការវាយប្រហារចុងក្រោយរបស់ខ្លួន។ ការបោះឆ្នោតលើកដំបូងក្នុងរយៈពេលបីថ្ងៃ ត្រូវបានកត់សម្គាល់ដោយមានការរំខាន រួមមានទាំងការចាក់ទឹកថ្នាំជ្រលក់ចូលទៅក្នុងប្រអប់សន្លឹកឆ្នោត ស្រាក្រឡុក Molotov ត្រូវបានគេគប់នៅការិយាល័យបោះឆ្នោតក្នុងស្រុកកំណើតរបស់លោក ពូទីន និងមានការវាយប្រហារតាមបណ្តាញអ៊ីនធឺណិត ត្រូវបានរាយការណ៍។